Rusiya xarici işlər naziri Sergey lavrov azərbaycanlı həmkarı Elmar Məmmədyarovla görüşdən sonra erməni həmkarı Edvard Nalbandyanla telefonlla əlaqə saxlayıb.
ANS PRESS-in məlumatına görə, Rusiya Xarici İşlər Nazirliyinin rəsmi saytında yerləşdirilən xəbərdə bildirilir ki, Lavrov Nalbandyanla da Dağlıq Qarabağ münaqişəsinin nizamlanması prosesini müzakirə edib.
Rusiyalı nazir Nalbandyana bildirib ki, Dağlıq Qarabağ münaqişəsinə dair danışıqları intensivləşdirməyin vaxtı çatıb. Lavrov bu barədə Elmar Məmmədyarovla da görüşdə Qarabağla bağlı müzakirələr zamanı bildirmişdi.
Lavrovun Məmmədyarovla danışıqlardan dərhal sonra Nalbandyana zənv vurması və erməni həmkarına "vaxt çatıb" mesajını verməsi diqqət çəkib.
Qeyd edək ki, Elmar Məmmədoyarov Moskvaya səfəri zamanı rusiyalı həmkarı Sergey Lavrovla görüşüb. Nazirlər Dağlıq Qarabağ münaqişəsi və regionda baş verən digər proseslər barədə də müzakirələr aparıblar.
Xatırladaq ki, ötən ilin avqust ayında Rusiyanın Soçi şəhərində Azərbaycan, Rusiya və Ermənistan prezidentləri İlham Əliyev, Vladimir Putin və Serj sarkisyan arasında üçtərəfli görüş keçirilmiş və Dağlıq Qarabağ münaqişəsinin həlli istiqamətində danışıqlar aparılmışdı.Həmin görüşdə də Rusiya prezidenti Vladimir Putin bildirmişdi ki, Dağlıq Qarabağ münaqişəsinin həllinin vaxtı çatıb və bu münaqişə tez bir zamanda həll edilməlidir.Azərbaycan prezidenti İlham Əliyev bəyan etmişdi ki, bu məsələ həddən artıq uzanıb, Ermənistan silahlı qüvvələri 20 ildən artıqdır ki, Azərbaycan torpaqlarını işğal altında saxlayır.
