Hacıbəy Heydərli
Azərbaycanda sosial media seqmenti cəmiyyətin güzgüsüdür. Cəmiyyətdə gözəl şeylər olanda bir anlıq sosial media da gözəlləşir, saflaşır, təmizlənir. O ki, efirlərdə gərginlik, səviyyəsizlik, bayağılıq artır sosial şəbəkələrdə də neqativ aura, təhqir, söyüş, bədbinlik gündəm olur.
Ölkədə son 2 günün gündəmi isə çox gözəldir, sanki insanlar arzusunda olduğu televiziyalar ilə qarşılaşıblar. Daha doğrusu arzusunda olduqları televiziyaya, verilişlərə, qonaqlara çatıblar.
Son 2 gündə sosial media gündəmi Xalq artisti Röya Ayxanın "Səs Azərbaycan”ın finalındakı möhtəşəm ifasıdır. Əslində, Röya "Məndən ötrü ağlama” mahnısını oxumayıb, Röya həmin ifanı yaşayıb. Və elə yaşayıb ki, bir anda milyonların qəlbini titrədib. Bu ifanın sosial mediada gündəm olması Azərbaycan tamaşaçısına, izləyicisinə bayağı deyənlərə də tərs sillədir. Demək ki, səviyyəli verilişlər, şoular olanda xalq onu sevə-sevə izləyir, paylaşır, tərif edir. Demək ki, Azərbaycan tamaşaçısının zövqü hələ korlanmayıb.
Efirlərə pulla çıxanlar heç vaxt xalqın qəlbini fəth edə bilməyəcəklər, xalqın zövqünü korlaya bilməyəcəklər.
Əslində, xalqımız bu ifanı trend etməklə əsl sənətə, əsl mədəniyyətə nə qədər dəyər verdiyini göstərib. Röya isə bir bənd ifa ilə son günlər onu tənqid edənlərə sənəti ilə cavab verib.
Bu ifası ilə onun Kan festivalına, oradan sonrakı söz-söhbətə, heç avtomobildə Ayaz Salayevə verdiyi cavaba da ehtiyacı olmadığını göstərdi. Demək ki, sənətçinin əsl yeri səhnədir, o layiq olduğu yerdə olanda böyük görünür.
Səhnədən və sənətdən söz düşmüşkən bu günlərdə efiri gözəlləşdirən daha bir məqamı mütləq qeyd etməliyəm. Əməkdar artist Aybəniz Haşımova və tələbələrindən olan Milananın ifası da bu günlərdə sosial medianın trendindədir. Milananın "Rəngarəng” verilişində oxuduğu "Dilbərin ariyası” qısa müddətdə milyonlarla izləyici toplayıb. 15 yaşlı qızcığaz bir ifası ilə efirlərə milyonlar tökənləri, şəxsi həyatlarını insanların gözünə soxanları, yalnız qalmaqalla gündəmdə olanları kölgədə qoyub.
Daha bir trenddə olan ifa isə Zabitə Əliyeva və İlkin Dövlətovun "Tarixin bir günü” verilişindəki duetləridir.
Demək ki, səs, geyim, mədəniyyət bir arada olanda sənət tamamlanırmış.
Demək ki, xalqımızın əsl sənətə, əsl səslərə, əsl səviyyəyə ehtiyacı var. Demək ki, televiziyalarımız da istəyəndə bunu göstərə bilir.
Xalqın da istəyi məhz budur: Zövqümüzü korlayanları yox, ruhumuzu qidalandıranlara efir verin.
