“Hamımız bilirik ki, cənnətdə yaşamırıq. Lakin hər birimiz özündən soruşsun – “Cəhənnəmə qayıtmaq istəyirikmi?”.
AZXEBER.COM-un gürcü mətbuatına istinadən verdiyi məlumata görə, bu sözləri bu gün Kutaisinin “Torpedo” stadionunda seçicilərlə görüşü zamanı Gürcüstan prezidenti Mixail Saakaşvili deyib. Onun sözlərinə görə, əgər cəhənnəmə heç kim qayıtmaq istəmirsə, onda Gürcüstanın yeganə alternativi qalır – irəli getmək.
Saakaşvili həmçinin ölkəsinin Avropa ilə münasibətlərinə toxunub. Kutaisidə yeni açılmış David Ağmaşenebeli adına aeroportun gələn ildən yüklənəcəyini bildirən dövlət başçısı qeyd edib ki, bu, Avropa dövlətlərinə aviauçuşların intensiv xarakter alacağı ilə bağlı olacaq. O bunu 2013-cü ildən Gürcüstanla Avropa İttifaqı arasında vizasız rejimin qüvvəyə minəcəyi ilə əsaslandırıb. Saakaşvili həmçinin bildirib ki, gələn ildən ölkəsi AB ilə azad ticarətə başlayacaq.
