Xəbər verdiyimiz kimi, "Sabah” komandası UEFA Çempionlar Liqasının əsas mərhələsinə vəsiqə qazanıb.
Azərbaycan çempionu pley-off mərhələsinin cavab oyununda İsrailin "Hapoel” (Beer-Şeva) komandasını 3:2 hesabı ilə məğlub edərək tarixində ilk dəfə turnirin əsas mərhələsində iştirak etmək hüququ əldə edib.
Tofiq Bəhramov adına Respublika stadionunda keçirilən qarşılaşmada əldə olunan nəticə Azərbaycan futbolu adına da əlamətdar hadisə kimi qiymətləndirilir.
Maraqlıdır, "Sabah”ın bu tarixi uğurunu necə qiymətləndirmək olar və komandanın UEFA Çempionlar Liqasının əsas mərhələsindəki şansları nə qədərdir?
Mövzu ilə bağlı AZXEBER.COM-a danışan idman eksperti Anar Xanlarov bildirib ki, "Sabah” üçün bu nəticə fantastik uğurdur:
"Sözsüz ki, bu nəticə "Sabah” üçün fantastik nəticə sayıla bilər. Tarixində ilk dəfə qatıldığı Çempionlar Liqasında əsas mərhələyə vəsiqə qazandılar. III təsnifat mərhələsini 4:1, pley-off mərhələsini isə 5:2 kimi hesabla keçdilər.
Təbii ki, ilk növbədə klubun büdcəsi böyük gəlir əldə edəcək. Təkcə Çempionlar Liqasının əsas mərhələsinə vəsiqə qazanmaq kluba 16 milyon avro qazandıracaq. Məlum məsələdir ki, komanda yaxşı mənada boyundan xeyli yuxarı tullanıb. Əsas mərhələdə heç kimin "Sabah”dan ciddi tələbi ola bilməz”.
Ekspert "Sabah”ın əsas mərhələdə keçirəcəyi oyunların komanda üçün böyük təcrübə qazandıracağını bildirib:
"Amma təbii ki, 8 oyun klubun özünə və futbolçulara böyük beynəlxalq təcrübə qazandıracaq. Nəticələr isə rəqiblərdən də asılı olacaq. Komandanın qarşısına konkret nəticə hədəfi qoymaq düzgün olmaz. Əsas məqsəd bu səviyyədə mümkün qədər yaxşı çıxış etmək və beynəlxalq təcrübə qazanmaqdır. Transfer siyasətində ciddi dəyişiklik olacağına inanmıram. Çünki Dambrauskasın sözlərindən də belə başa düşüldü ki, hazırkı heyətdən çox razıdır, bu heyətə inanır və yola davam edəcək".
Fəridə Əsədzadə
