Cəbrayıl rayon İcra Hakimiyyətinin sabiq başçısı Mahmud Quliyevin fəaliyyətinin yoxlanılmasına qərar verilib. Buna səbəb onun vəzifədə olduğu müddətdə dövlət vəsaitlərinin təyinati üzrə xərclənməsinə dair kifayət qədər ciddi şübhələrin yaranmasıdır.
Bu barədə məlumat verən etibarlı mənbənin sözlərinə görə, rayonun yeni icra başçısı təyinatı gecikir. “Buna səbəb məhz haqqında danışılan şübhələrdir. Artıq Mahmud Quliyevin icra başçısı olduğu dövrün təftişi ilə bağlı hazırlıqlar görülür. Yoxlamaların martın 25-dən sonra başlanılması gözlənilir. Təftiş nəticəsində ortaya çıxarılacaq korrupsiya faktlarının sabiq icra başçısına ciddi başağrısı yaratması istisna edilmir. Hətta onun cinayət məsuliyyətinə cəlb edilməsi də ən mühüm ehtimalllardan biridir. Yalnız bundan sonra rayona yeni icra başçısının təyin ediləcəyi deyilir. Bu böyük ehtimalla Quliyevin xələfinə icra başçısı postunu problemlərsiz təslim etmək istəyi ilə bağlıdır” deyə mənbəmiz əlavə edib.
Xatırladaq ki, ölkə başçısının 18 dekabr 2000-ci il tarixli 593 nömrəli sərəncamı ilə Cəbrayıl Rayon İcra Hakimiyyətinin başçısı vəzifəsinə təyin edilən Mahmud Quliyev prezidentin 3 mart 2016-cı il tarixli sərəncamı ilə həmin vəzifədən azad olunub. Onun vəzifəsi ilə vidalaşmasında əsas amil kimi bu ilin yanvar ayında Cəbrayıl sakinlərinin sosial tələblərlə etiraza qalxması və bundan sonra sabiq icra başçısının etirazçılarla görüşüb onlardan bəzilərinin ünvanına təhqir yağdırması göstərilir.
Mənbəmizin dediyinə görə, M.Quliyevin bu davranışının sosial şəbəkələrdə geniş əks-səda doğurduğunu nəzərə alaraq, onu Prezident Administrasiyasıən çağırıblar. “Burada sabiq icra başçısı ciddi tənbeh edilib, eyni zamanda yaxın vaxtlarda postundan kənarlaşdırıla biləcəyinə dair xəbərdarlıq olunub. Quliyev söyüş qalmaqalının ona qarşı təxribat olduğunu desə də, bu inandırıcı qarşılanmayıb” deyə qaynağımız vurğulayıb.
Mənbəmizin sözlərinə görə, vəzifəsindən azad edildikdən təxminən bir həftə sonra M.Quliyevin istirahət və səhhət səbəbilə ölkəni tərk etməsi də maraq doğurur: “Əgər onun fəaliyyəti ilə bağlı genişmiqyaslı yoxlamalar başlayarsa, sabiq icra başçısı ölkəyə qayıtmaya da bilər. O, Cəbrayıl rayonuna rəhbərlik etdiyi dövrlə bağlı ciddi korrupsiya və digər qanunsuzluq vasitələrinin aşkarlanmasından, nəticə etibarilə isə bunun hətta azadlığını itirmək riski yaratmasından ciddi əndişə keçirir, böyük ehtimalla vəzifəsindən kənarlaşdırıldıqdan qısa vaxt sonra ölkədən getməsi də planlı hərəkət olub, hətta onun məlum qorxuları səbəbindən ölkəyə qayıtmaması da istisna olunmamalıdır".
Qaynağımız deyib ki, yuxarı dairələrdə M.Quliyevin fəaliyyətindən narazılıqlar xeyli müddətdir mövcud olub, Cəbrayıl sakinlərinin bu ilin yanvarındakı etiraz aksiyası və sabiq icra başçısının vətəndaşlara qarşı həqarətli davranışı səbr kasasını daşıran son damlaya çevrilib. Onun icra başçısı ikən fəaliyyətinin təftişinə dair qərar verilməsi ilə bağlı qeyri-rəsmi bilgilər isə Quliyevin başı üzərindəki “qara buludlar"ın nəinki dağıldığını, hətta daha da sıxlaşdığını göstərir.
Onu da deyək ki, Cəbrayıl Rayon İcra Hakimiyyətinin başçısı vəzifəsini hazırda Arif Fərzəliyev icra edir. Qaynar.info-nun etibarlı mənbəsi Fərzəliyevin uzun müddətdir rayon İcra Hakimiyyəti başçısının müavini postunu tutduğunu deyib. M.Quliyev “vurulduqdan” sonra isə onun vəzifəsinin icrası adıçəkilən müavininə tapşırılıb.
qaynar.info
