Samux rayonunda 1964-cü il təvəllüdlü Südabə şəxsi münasibətlər zəminində yaranan mübahisə zamanı qızının əri Səmədə (adlar şərtidir - red.) xəsarət yetirib.
AZXEBER.COM Demokrat.az-a istinadən xəbər verir ki, hadisə Samux rayonunun kəndində baş verib.
Südabə yaşadığı evin mətbəxində aralarında baş vermiş şəxsi münasibətlər zəminində mübahisə zamanı qəndqabı ilə qəsdən Səmədin alın nahiyəsinə vurub, ona xəsarətlər yetirib.
Hadisəni törədən Südabə barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Südabə ona elan olunmuş ittiham üzrə özünü təqsirli bilib.
O, ifadəsində qeyd edib ki, zərərçəkmiş Səməd onun kürəkəni, yəni qızı Məlahətin əridir:
"Hadisə günü yaşadığım evin mətbəxində olan zaman Səməd evə gəldi. Səməd onun haqqında nalayiq ifadələr işlətməməsini deyərək, digər qızım Vüsalə ilə mübahisə yaratdı. Mübahisə zamanı Səməd qızımın baş nahiyəsinə əli ilə vuraraq, onu döydü. Mən həmin vaxt nə edəcəyimi bilmədim. Stolun üstündə olan qəndqabını əlimə alaraq Səmədin baş nahiyəsindən vurdum. Həmin vaxt qəndqabı hissələrə bölünərək qırıldı. Qəndqabının qırıqları onun sağ əlinə xəsarət yetirdi. Sonra isə qızım Məlahət ilə həyətə çıxdıq. Səməd evdən çıxıb getdi".
İş üzrə zərərçəkmiş qismində ifadə verən Səmədin sözlərinə görə, məlum hadisə günü mobil telefonla danışan zaman baldızı Vüsalə onun ünvanına nalayiq ifadələr işlədib, onu söyüb, təhqir edib:
"Mən yaşadığım evdən çıxaraq Samux rayonunun kəndinə gəldim. Kolayır kəndində baldızımdan haqqımda nalayiq ifadələr işlətməsinin səbəbini soruşdum. Həmin vaxt aramızda mübahisə oldu.
Mübahisə zamanı Vüsalə nalayiq ifadə işlətdiyinə görə, onun baş nahiyəsindən əlimlə vurdum. Mən Vüsaləni vuran kimi qayınanam Südabə baş nahiyəmə qəndqabını vurdu. Baş nahiyəmdən qan gəldiyini Vüsalə və Südabə görən zaman tez küçəyə qaçdılar. Mən Samux Rayon Polis Şöbəsinə ərizə ilə müraciət edərək, məlumat verdim.
Bu cinayət işinə Samux Rayon Məhkəməsində baxılıb.
Məhkəmənin hökmü ilə Südabə 360 saat ictimai işlər cəzasına məhkum edilib.
