Yay mövsümünün gəlişi ilə bərabər dənizkənarında yerləşən obyektlərdən şikayətlər də artır.
Belə bir hadisə ilə AZXEBER.COM-un əməkdaşı rastlaşıb.
Belə ki, Buzovnada yerləşən "Seaside" restoranında çay ilə mürəbbə sifariş verən əməkdaşımız kobud rəftara məruz qalıb.
Restoranda çay ilə mürəbbə istəyən müştəriyə ofisiantlar deyib ki, burada bu cür xidmət göstərilmir. Ramil adlı ofisiant normal şəkildə bunun səbəbini açıqlayıb və qeyd edib ki, onluq bir məsələ yoxdur. Müştəri də bununla razılaşıb və məsələ həll olunub.
Daha sonra özünü restoranın ictimaiyyətlə əlaqələr şöbəsinin müdiri kimi təqdim edən Firuz Rəfiyev adlı şəxs müştəriyə kobud şəkildə yaxınlaşaraq deyib: "Burada artıq-əskik söhbətlər olmasın, dedilər ki, çay ilə mürəbbə verilmir. Gedin, kimə istəyirsiz şikayət edin. Bizə heç kim söz deyə bilməz. Əgər çay istəyirsizsə, bunu mürəbbə ilə yox, ya künəfə ilə, ya ləbləbi ilə içməlisiz. Xoşunuz gəlmirsə, gedin kimə istəyirsiz, şikayət edin".
Müştəri daha sonra çay ilə paxlava istəyib, Firuz Rəfiyev isə deyib ki, "sizə çay ilə paxlava da vermirik. Restoranda heç nə yoxdur, gedin, hara istəyirsiz, şikayət edin. Biz də belədir, heç kimdən qorxumuz yoxdur"
Firuz Rəfiyev daha sonra bir neçə rəhbər şəxsin adını çəkib və ona bu səlahiyyəti həmin şəxslərin verdiyini deyib.
AZXEBER.COM Firuz Rəfiyevin kimliyi ilə bağlı kiçik araşdırma aparıb və məlum olub ki, o ATV-də yayımlanan "Bozbaş Pictures" serialında epizodik rol alıb. Maraqlıdır ki, həmin rolda polis obrazını canlandıran bu şəxs daha sonra sosial şəbəkə hesabında polis formasıyla fotosunu paylaşıb və özünü polis kimi qələmə verib. O polis formasıya fotosuna yazıb: "Vətənə xidmət, vətəndaşlarına isə qulluq edirəm".
Məlumat üçün qeyd edək ki, polis əməkdaşlarının sosial şəbəkədə foto və ya video paylaşılmasına icazə verilmir. Firuz Rəfiyev isə ona verilən aktyor rolundan sui-istifadə edərək, polis formasında fotosunu yayıb.
Azərbaycan polisinin və dövlət məmurlarının adından istifadə edən bu şəxsin kimə güvəndiyi isə sual altındadır.
Müştəri ilə kobud danışan və onu təhqir edən "Seaside" restoranının əməkdaşı Firuz Rəfiyev barəsində yaxın günlərdə aidiyyatı qurumlara da müraciət ediləcək. Ümid edirik ki, media mənsubları ilə kobud rəftar edən və müştəriyə "get kimə istəyirsən, müraciət elə" deyən, eyni zamanda Azərbaycan polisinin nüfuzundan istifadə edən bu şəxs haqqında restoran rəhbərliyi də tədbir görəcək. Şikayətçi həmçinin qeyd edib ki, restorandan yox, onunla kobud danışan bu şəxsdən şikayətçidir.
AZXEBER.COM məsələ ilə bağlı "Seaside" restoranı ilə əlaqə saxlayıb. Restorandan bildirilib ki, məsələ araşdırılacaq və həqiqətən belə bir şey olubsa, tədbir görüləcək.
