"Azərbaycan və Özbəkistan arasındakı tarixi dostluq əlaqələri bu gün yeni bir əməkdaşlıq müstəvisinə qədəm qoyub. İki ölkə arasında Qeyri-Hökumət Təşkilatlarının Əməkdaşlıq Forumu bu istiqamətdə xüsusi əhəmiyyət daşıyan bir platformaya çevrilib”
Bu sözləri AZXEBER.COM-a açıqlamasında Daşkəntdə baş tutan Özbəkistan - Azərbaycan Qeyri-Hökumət Təşkilatlarının Əməkdaşlığında Forumunda iştirak edən "Qarabağın Tərəqqisi Naminə" İctimai Birliyinin sədri Şəbnəm Səfərova deyib.
O qeyd edib ki, forum hər iki ölkənin QHT sektoru üçün çox böyük əhəmiyyətə malikdir:
"Mənim üçün bu tədbirdə iştirak etmək və belə bir mühüm prosesin bir parçası olmaq böyük şərəfdir. Bu forum, Azərbaycan və Özbəkistanın qeyri-hökumət təşkilatları arasında təcrübə mübadiləsi, birgə layihələrin həyata keçirilməsi və yeni tərəfdaşlıqların qurulması üçün vacib bir zəmin yaradır. Bizim üçün mühüm olan, iki ölkənin vətəndaş cəmiyyətlərinin daha sıx inteqrasiyası və birgə inkişaf naminə səmərəli əməkdaşlıq yollarının müəyyən edilməsidir.
Azərbaycan və Özbəkistan, beynəlxalq səviyyədə bir-birinin ərazi bütövlüyünü dəstəkləyən, mədəni və tarixi bağlarla möhkəmlənmiş iki dost, qardaş ölkədir”.
Şəbnəm Səfərova forum çərçivəsində imzalanan memorandumlar haqda da danışıb:
"Forum çərçivəsində imzalanan Anlaşma Memorandumları isə bu əlaqələri daha da dərinləşdirəcək, sosial müdafiə, gender bərabərliyi, işsizlik və digər aktual sahələrdə birgə fəaliyyətlərin reallaşdırılmasını təmin edəcəkdir. Hesab edirəm ki, bu kimi təşəbbüslər təkcə iki ölkənin inkişafı üçün deyil, həm də regionda sülhün və sabitliyin qorunmasına töhfə verəcəkdir. Azərbaycan və Özbəkistan QHT-ləri arasında qurulan bu əməkdaşlıq modeli, digər ölkələr üçün də örnək ola bilər”.
