Oktyabrın 17-dən yağan aramsız yağışlar özü ilə bir sıra problemləri də gətirir.
Belə ki, paytaxtın Heydər Əliyev prospektindəki Bağırov körpüsünün istinad divarından gələn yağış sularının videogörüntüsü bu gün kifayət qədər müzakirə olunub. İstinad divarının daxilindən tunelə gələn su körpünün dağılma təhlükəsindən xəbər verirmi?
Qaynarinfo.Az-a açıqlama verən "Azəravtoyol” ASC-nin Mətbuat Xidmətinin rəhbəri rəhbəri Anar Nəcəfli bildirdi ki, araşdırmalar aparılır, hazırda heç bir təhlükə yoxdur:
"Fövqəladə Hallar Nazirliyi ilə birlikdə mütəxəssislər tərəfindən ərazidə texniki baxış keçirilib. İstinad divarından gələn suyun mənbəyi araşdırılır. Amma heç bir təhlükə yoxdur. Həmin ərazidə kollektorun həddən artıq yüklənməsi nəticəsində su geriyə, yəni yola tərəf axır. Nəticədə həmin suların divarların arasından gəlməsi müşahidə olunur. İstinad divarlarında hər hansı bir təhlükə yoxdur. Sadəcə olaraq, su axını o qədər güclü olub ki, istinad divarlarındakı üzlük daşların arasından su gəlib.Təhlükə olsa idi, aidiyyatı orqanlar tərəfindən prospekt bağlanardı. Bu prospekt kifayət qədər işlək yoldur və nəqliyyat vasitələrinin ən sıx istifadə etdiyi tuneldir".
