Son zamanlar Azərbaycanda "uşaq pulu"nun verilməsi ilə bağlı müzakirələr gündəmdədir. İctimaiyyətdə bu mövzuyla bağlı müxtəlif fikirlər səsləndirilir. Bəziləri bildirir ki, uşaq pulu bərpa olunmalıdır. Bəziləri isə ünvanlı sosial yardımın uşaq pulu kimi verilməsini təklif edir.
Bəs Azərbaycanda uşaq pulu mövzusunda aparılan müzakirələr hansı istiqamətdə olmalıdır?
AZXEBER.COM mövzu ilə bağlı Vətəndaşların Əmək Hüquqlarının Müdafiə Liqasının rəhbəri, hüquq müdafiəçisi Sahib Məmmədovun münasibətini öyrənib.
O uşaq müavinətləri ilə bağlı müzakirələrin səriştəli getmədiyini düşünür:
"Uşaqlara yönələn müavinətlər 3 qrupa yönəlir. Birincisi, demoqrafik vəziyyətə görə verilən birdəfəlik və ya aylıq müavinətlərdir. Bu o ölkələrə aiddir ki, orda əhali sayı kəskin aşağı düşür. İkinci, uşaqlara yönələn müavinət növü isə imtizaya görədir. Azərbaycanda təminatsız ailələrin uşaqları, valideyn himayəsindən məhrum olmuş uşaqlar bu kateqoriyaya aiddirlər. Üçüncü, qrup imtiyazlar isə uşaqlara səhhətləri ilə bağlı əlilliyə görə verilən müavinətdir.
Azərbaycanda demoqrafik vəziyyətə görə uşaq müavinəti nəzərdə tutulmayıb. İkinci və üçüncü qrup üzrə 11 növ uşaq müavinəti verilir. Təminatsız ailələrin 1 yaşına çatmayan uşaqlarına o şəxslərə ki, ünvanlı sosial yardım alırlar onlara da əlavə olaraq 100 manat pul verilir. Qeyd etdiyim kimi bu məsələnin müzakirəsi o qədər də peşəkar getmir”.
Sahib Məmmədov müzakirələrin fərqli istiqamətdə aparılarsa, daha səmərəli olacağını bildirib:
"Müzakirələr 11 növ uşaq müavinətinin artırılması istiqamətində aparıla bilər. Yaxud da elə müavinət var ki, onların təyin olunmasında prosedur çətinliyi var. Həmçinin, yeni müavinət növləri ortaya çıxarmaq lazımdır. Selektiv abortlar nəticəsində ölkədə qızların sayında kəskin azalma müşahidə edilir. Mən təklif edirəm ki, doğulan qız uşaqlarına birdəfəlik ödəniş miqdarı daha çox olsun. İkinci qız uşaqlarına isə daha büyük məbləğdə ödəniş edilsin. Bu eyni zamanda stimullaşdırıcı addımdır. Məsələ ilə bağlı konkret təkliflər var. Biz təklifləri hazırlayıb dövlətə təqdim etmişik. Uşaq müavinətinin strukturu haqqında məlumatı olmayanlar bu mövzuda danışır. Məncə, bu barədə ancaq peşəkarlar danışıb, təkliflər irəli sürülməlidir”.
Mövzu ilə bağlı AZXEBER.COM "Müasir Müsavat Partiya"sının sədri Hafiz Hacıyevin də fikirlərini öyrənib.
O bildirib ki, əhalinin sayının çox olması uşaq pulunun həllində əsas rol oynayır:
"Əhalinin sayı nə qədər çox olsa yaxşı olar. Ancaq ölkədə uşaq pulu problemi var. Bəzi deputatlar bunun əksinə danışır. İnanırıq ki, problemin həll olunması hörmətli prezidentimiz tərəfindən nəzərə alınacaq. Xalqımız bunu fikri yüksək qiymətləndirəcək. Gələcək nəsillərin artması inkişafa səbəb olur. Dünyada əhalinin sayında azalma gedir. Bizim kimi dövlətlərdə də bu məsələ aşağı səviyyədədir. Bu da kasıbçılıqdan irəli gəlir".
Hafiz Hacıyev qeyd edib ki, insanlar bir-iki uşağı saxlamaqda çətinlik çəkirlər:
"Bu sahədə böyük qayğı lazımdır. Düşünürəm ki, bu Azərbaycan xalqı üçün əhəmiyyətli fikirdir. Ancaq valideynlərə uşağı saxlamaqdan ötür uşaq pulu verilməlidir. Sabah onlar əsgər, alim, jurnalist, mühəndis olacaqlar. Say tərkibini, xalqın yaxşı yaşamasını hər kəs düşünməlidir”,- deyə Hafiz Hacıyev söyləyib.
Şəbnəm Zahir
Yazı Medianın İnkişafı Agentliyinin "Gender, ailə və demoqrafiya məsələlərinin işıqlandırılması" mövzusunda dərc edilib.
