Xalq artisti Səməd Səmədov yeni yaratdığı "Qismət" vokal qrupu ilə birlikdə ilk işini Beynəlxalq Mətbuat Mərkəzində (BMM) mediaya təqdim etdi. ANS PRESS-in məlumatına görə, “Bakı - Yurdum” mahnısına çəkilmiş musiqi çarxını Faiq Kərimoğlu ekranlaşdırıb. Mahnının musiqisi Turala, sözlərini isə Zaura məxsusdurArtıq bir "Qismət" qrupunun rəhbəri olan xalq artisti ikinci "Qismət" qrupunu Tural, İlqar və Renat adlı oğlanların təkidi ilə yaratdığını açıqladı: "Düz 6 ay idi ki, başımı dəng edirdilər ki, bizə köməklik et. Heç yadımdan çıxmır, dedilər ki, axı siz xalq artistisiniz, gənclərə dəstək olmalısınız. Bu sözlərdən sonra yox deyə bilmədim. Və qərara gəldim ki, “Qismət” ansamblının nəzdində eyniadlı vokal qrupu açaraq onları bu qrupa cəlb edim. Qruplar arasında fərq ondadır ki, bu vokal qrupudur. Bu gənclərin ifasından məmnun qaldım. Qrupa qəbul edəndən sonra bilmişəm ki, hər üçü peşəkar musiqiçidir".Şou-biznesdə yetərincə kişilərdən ibarət musiqi qruplarının olduğunu vurğulayan Səməd Səmədov yeni qrupunun tezliklə birinci yerdə olacağına söz verdi: "Hesabıma görə, bizim qrup beşincidir. Amma sizə söz verirəm, tezliklə birinci olacağıq. Səməd dedisə, qurtardı!".
