Bu gün xanəndə Səxavət Məmmədovun doğum günüdür. Yaşasa idi 72 yaşını qeyd edəcəkdi.
AZXEBER.COM xəbər verir ki, Səxavət Məmmədov 1953-cü il oktyabrın 23-də Ağdam rayonunun Abdal-Gülablı kəndində dünyaya göz açıb.
1971-ci ildə Asəf Zeynallı adına Musiqi Texnikumuna daxil olan Səxavət ustad xanəndə, Xalq artisti Hacıbaba Hüseynovdan muğamın sirlərini öyrənib.
1976-cı ildə "Hümayun" xalq ansamblının solisti olub. 1983-88-ci illərdə Dövlət İncəsənət İnstitutunda təhsil alan Səxavət Məmmədov Azərbaycan muğamını bir çox ölkələrdə təmsil edib.
Səxavətin yaratdığı "Qarabağ" instrumental ansamblı Qarabağ hadisələrinin ilk illərində yaranıb. Cəmi 38 il ömür sürən Səxavət Məmmədov keçmiş SSRİ və Avropa ölkələrində konsert verməklə təkcə Qarabağı deyil, həm muğamımızı, həm də Azərbaycan həqiqətlərini də dünyaya çatdırıb.
Uşaqlıq və gənclik illərindən "Segah" muğamına bağlı olan sənətkarın, oxuduğu mahnıların əksəriyyəti məhz "Segah" ladındadır. "Ay bəri bax", "Uca dağlar", "Yar bizə qonaq gələcək", "Ay çiçək", "Sarı bülbül", "Sona bülbüllər" və s. Mərhum sənətkarın ən yaddaqalan ifalarından olan "Azad bir quşdum" mahnısıdır.
Xanəndə 1991-ci il sentyabrın 30-da avtomobil qəzasında dünyasını dəyişib.
Aysel
