Şimali Koreyanın Ukrayna müharibəsinə göndərdiyi qoşunlar ağır itki verdikdən sonra bölgədən çıxarılıb.
AZXEBER.COM xarici mediaya istinadən xəbər verir ki, bunu "New York Times"a açıqlamasında Ukrayna və ABŞ rəsmiləri bildiriblər.
Belə ki, 2024-cü ilin noyabrında Rusiyaya gələn 11 min Şimali Koreya əsgərinin yarısından çoxu ölüb və ya yaralanıb və son iki həftə ərzində heç bir Şimali Koreya əsgəri cəbhə xəttində görünməyib.
Ukraynadakı müharibəyə dəstək üçün göndərilən Şimali Koreya qoşunları Kursk bölgəsinə təyin edilib. Lakin onların maddi-texniki çatışmazlıqlar, zəif koordinasiya və Ukrayna ordusunun əks-hücumları səbəbindən böyük itkilər verdiyi bildirilir.
Ukraynanın ali hərbi komandanı general Oleksandr Syrsky cəmi üç ay ərzində Şimali Koreya qoşunlarının yarısının sıradan çıxdığını bildirərək, onların çıxarılmasının Ukrayna üçün böyük qazanc olduğunu bildirib.
Şimali Koreya lideri Kim Çen In ötən il Rusiyaya külli miqdarda artilleriya mərmisi və hərbi sursat verib və bunun müqabilində Putindən hərbi və diplomatik dəstək alacağına ümid edib.
Şimali Koreya qoşunlarının cəbhədən çıxarılması Rusiya ordusu üçün böyük itki hesab olunur. Onsuz da əsgər qıtlığı yaşayan Moskva indi bu boşluğu doldurmaq üçün yeni resurslar tapmalıdır.
Digər tərəfdən, Ukrayna ordusu bu inkişafdan istifadə edərək Kursk bölgəsində yeni hücuma keçib. Bununla belə, Rusiyanın bölgəyə yeni qoşunlar göndərməklə Ukraynanın irəliləyişini dayandırmağa çalışdığı bildirilir.
Mikayıl
