"ATA İttifaqı”nın prezidentliyə namizədi Sinan Oğan Türkiyədə prezident seçkilərinin ikinci turunda hansı tərəfi dəstəkləyəcəyi barədə qərarını açıqlayıb. S.Oğan "Cümhur İttifaqı”nın namizədi Rəcəb Tayyib Ərdoğanı dəstəklədiklərini bildirib.
Onun bu seçiminin seçkiyə necə təsir edəcəyi ilə bağlı politoloq Oktay Qasımov AZXEBER.COM-a açıqlama verib.
Politoloq bildirib ki, Sinan Oğanın bu dəstəyi daha çox psixoloji əhəmiyyət daşıyır:
"Türkiyə prezident seçkilərində iştirak edib 5.17% səs qazanan Sinan Oğan öz mövqeyini açıqladı. Təbii ki, onun kimi dəstəkləməsi vacib elementdir. Seçki kampaniyasında bu cür mesajlar dəstək verilən namizədin qələbəsinin artmasına yardım edən faktorlardan biridir. Hesab edirəm ki, Sinan Oğanın bu dəstəyi daha çox psixoloji əhəmiyyət daşıyır. Sinan Oğana səs vermiş seçici kütləsi daha çox Kılıçdaroğlu və Ərdoğana etiraz edərək səs verənlərdir. Sinan Oğanı müdafiə edən partiyalar da parlamentdə çox cüzi səs aldılar. Bu baxımdan Sinan Oğana səs verən seçici kütləsinin sabit seçicilər olmadığını demək olar. Birbaşa Sinan Oğana bağlı olmadıqları üçün çağırışlarına mütləq şəkildə əməl edəcəklərini söyləmək doğru olmaz”.
Oktay Qasımov birinci turun nəticələrinin xüsusilə də parlament seçkilərindəki nəticələrin ikinci turun nəticələrinə ciddi təsir edəcəyini qeyd edib:
"Cümhur ittifaqı”ndan parlament seçkilərində 326 millət vəkili seçildi. Parlamentdə nisbi səs çoxluğu əldə olunub. Bu müxalifətin birləşmiş qüvvələrdən xeyli artıq say deməkdir. Həm sabit seçici, həm də parlamentdəki bu nəticələrə uyğun olaraq mən düşünürəm ki, ikinci turda hazırda fəaliyyət göstərən prezident Ərdoğanın qələbə çalma ehtimalı yüksəkdir. Seçki kompaniyasının aparılması baxımından iqtidar komandası daha hazırlıqlı görünür. Hakimiyyətin verdiyi müəyyən üstünlüklər var ki, bunlar da səs vermə prosesində nəticələrə təsir edən amillərdən sayıla bilər. Hazırda keçirilən rəy sorğuları ikinci turda Ərdoğanın qalib gələcəyi fikrini deməyə əsaslar yaradır. Qeyd etdiyim kimi, Sinan Oğanın Ərdoğanın dəstəkləməsinin real səs sayından çox psixoloji təsiri olacaq. Bu seçiçi kütləsinə təsir edən amillərdən biri olacaq. Bu dəstək vacibdir, ancaq həlledici deyil”.
Xatırladaq ki, 28 may tarixində Türkiyədə prezident seçkilərinin ikinci turu keçiriləcək. İlk turda Ərdoğan və Oğan müvafiq olaraq 49,5% və 5,2% səs toplaya bildilər. Qılıncdaroğlu 44,9%, Məhərrəm İncə isə geri çəkilməsinə baxmayaraq 0,4% səs toplayıb. Ərdoğan səslərin mütləq çoxluğundan 0,5% az səs aldığı üçün Qılıncdaroğlu ilə mayın 28-ində keçiriləcək seçkilərin ikinci turunda mübarizə aparacaq.
Şəbnəm Zahir
