"Slaviya” (Praqa, Çexiya) UEFA Çempionlar Liqasının Liqa mərhələsinin 2-ci turunda sabah Bakıda "Sabah”ın qonağı olacaq.
Rəqib komandanın baş məşqçisi Yindrix Trpişovski matçdan öncə keçirilən mətbuat konfransında jurnalistlərin suallarını cavablandırıb:
– Meydana çıxacaq heyət barədə nə deyə bilərsiniz, zədəli futbolçuların vəziyyəti necədir?
– Bəzi oyunçularımızın müəyyən fiziki çətinlikləri və zədələri var idi. Artıq sabaha hansı futbolçuların kömək edə bilməyəcəyini dəqiq bilirik. Lakin geniş heyətə malik olduğumuz üçün məmnunam. Şans verəcəyimiz digər futbolçularla mövqedəki çatışmazlıqları aradan qaldırmışıq.
– Meydan sahibi haqqında təəssüratlarınız nədir?
– "Sabah” oynadığı futbol üslubuna görə "Barselona”ya bənzəyən bir komandadır. Meydanda klassik 4-3-3 sxemindən istifadə edirlər və daha çox hücumameyilli oyuna üstünlük verirlər. Topa davamlı nəzarət etməyə çalışan, fərdi keyfiyyətləri yüksək futbolçulardan qurulmuş kollektivdir. Hətta "Mançester Yunayted”lə matçda da çoxlu qol imkanları olmuşdu və həmin qarşılaşmada da daha yaxşı nəticə qazana bilərdilər. "Sabah” ardıcıl hücumlar təşkil edən komandadır. Sabahkı matçda hansı tərəfin forvardları öz şanslarını daha dəqiq dəyərləndirəcəksə, həlledici amil də elə bu olacaq.
– Vaxtilə "Slovan”ın (Bratislava) baş məşqçisi kimi Avropa Liqasında "Qarabağ”a qarşı mübarizə aparmışdınız. Geridə qalan illər ərzində həm öz karyeranızda, həm də Azərbaycan futbolunda nələrin dəyişdiyini düşünürsünüz?
– Bəli, Bakıya ikinci dəfədir gəlirəm. Təxminən 10 il əvvəl bura gəlmişdim. Düşünürəm ki, sabahkı matç da ab-hava baxımından həmin oyuna uyğun və maraqlı keçəcək. Şəhərdə çox böyük inkişaf və dəyişikliklər var. Həmin illər ərzində mənim karyeramda da mühüm dönüşlər oldu, "Slaviya”nın baş məşqçisi postuna gətirildim və böyük uğurlar qazandıq.
– Bukmekerlər və jurnalistlər bu matçda "Slaviya”nı aşkar favorit görürlər. Bu barədə fikirləriniz nədir?
– Bir neçə il əvvəl Balkan klublarına qarşı oynayanda da oxşar vəziyyət idi. Adları çox tanınmasa da, çox keyfiyyətli futbol oynayırdılar. "Sabah”la oyun bizə böyük təcrübə qazandıracaq. Tərəfdarlarımızın bizə inandığını bilirik və onları məyus etməməyə çalışacağıq.
///operativmedia///
