Bu gün Hindistanda ölkə tarixində ən səs-küylü məhkəmə proseslərindən biri başlayır. Söhbət Paytaxt Nyu-Dehlidə 23 yaşlı tələbə qızın kütləvi şəkildə zorlanması və sonradan xəstəxanada ölməsi ilə bağlı məhkəmə işindən gedir. Müttəhimlər kürsüsündə əyləşən 6 nəfərə ölüm hökmünün verilməsi tələb edilir. Məhkəməyə aidiyyatı olan 2500 vəkilin hamısı müttəhimləri müdafiə etməkdən imtina edib. Onların fikrincə, bu cür cinayəti müdafiə etmək və bu insanların maraqlarını təmsil etmək mənəviyyatsızlıq olardı. İndi müttəhimlərin müdafiəçilərini dövlət təyin edəcək. Müttəhimlərdən birinin yetkinlik yaşına çatmadığı bildirilir.Xatırladaq ki, vəhşi cinayət dekabrın ortalarında törədilmişdi. 23 yaşlı tələbə qız dostu ilə kinodan qayıdarkən avtobusda içkili şəxslərin hücumuna məruz qalmışdı. İstintaq sonradan onların hamısının avtobus sürücüsünün tanışları olduğunu müəyyənləşdirib. 3 nəfər gənc qızın dostunun ifadəsi ilə dərhal, 3 nəfər isə axtarışa verildikdən sonra həbs edilmişdi. Təcavüzə məruz qalmış gənc qız ağır vəziyyətdə təyyarə ilə Hindistandan Sinqapura aparılmış və bir neçə gündən sonra xəstəxanada dünyasını dəyişmişdi. Həkimlər onun daxili orqanlarının və beyninin zədələndiyini bildirirdilər.
