"Bu hadisə mənim üçün çox böyük itkidir. Hadı müəllimlə dünən 3-4 dəfə danışmışdıq. Sonuncu dəfə elə dünən günorta saatlarında mənə zəng vurdu və danışdıq. Çox nikbin, həyatsevər insan idi".
Bu fikirləri AZXEBER.COM-a açıqlamasında eks deputat Hüseynbala Mirələmov mərhum Hadı Rəcəbliylə vida mərasimində deyib.
Sabiq deputat bildirib ki, ilk eşidəndə Hadı Rəcəblinin ölümünə inana bilməyib:
"Mən heç vaxt inana bilmirdim ki, bu insan ölə bilər. Hər gün idmanla məşğul olurdu. Sizi inandırım ki, 76 yaşında olmasına baxmayaraq çox həyatı sevən insan idi. Mən həyatımın 70 ilinin demək olar ki, xeyli hissəsini onunla paralel şəkildə yaşamışıq. Birinci sinifdə bir yerdə oxumuşuq. 15 il Milli Məclisdə bir stolda oturmuşuq. Çox həssas insan idi. Dövlətimizi, dövlətçiliyimizi həyatı qədər sevirdi. Özünə aid olmayan məsələləri və problemləri də öz üzərinə götürürdü. Camaat onu tənqid edirdi ki, Hadı müəllim maaşları artırmır, pensiyaları vermir. Hansı ki, bütün bunların heç birinin ona aidiyyatı yox idi.
Xəbəri alanda inanmadım. Dərhal telefonuna zəng vurdum, amma açmadı. Sonra kürəkəninə yığdım, o da ağlaya-ağlaya Hadının vəfat etdiyini bildirdi. Ölüm acı həqiqətdir. Bundan qaçmaq olmaz. Allah rəhmət etsin".
Mikayıl Mirzəzadə
