Sosial şəbəkələr artıq insanların yalnız ünsiyyət və informasiya mübadiləsi apardığı platformalar deyil. Bir çox insan yeni dostlar qazanmaq, ünsiyyət qurmaq və romantik münasibətlərə başlamaq üçün də internetdən istifadə edir.
Bəs sosial şəbəkədə tanış olmaq nə dərəcədə normaldır və belə tanışlıqlar uğurlu münasibətə çevrilə bilərmi?
AZXEBER.COM xəbər verir ki, araşdırmalar göstərir ki, onlayn tanışlıqlar real həyatda münasibətlərin başlanğıc nöqtəsinə çevrilə bilir. Pew Research Centerin araşdırmasına görə, münasibət təcrübəsi olan yeniyetmələrin 24 faizi əvvəlcə internetdə tanış olduğu şəxslə münasibətdə olduğunu bildirib.
Mütəxəssislərə görə, tanışlığın sosial şəbəkədə başlaması özlüyündə münasibətin uğurlu və ya uğursuz olacağını müəyyən etmir. Əsas məsələ tərəflərin bir-birini zamanla daha yaxından tanıması, qarşılıqlı hörmət və etimadın formalaşmasıdır.
Lakin onlayn tanışlıqlarda diqqətli olmaq xüsusilə vacibdir. Çünki sosial şəbəkədə insanlar özləri haqqında tam və ya real olmayan məlumatlar paylaşa, fərqli bir obraz yarada bilərlər. Araşdırmada da bəzi yeniyetmələrin internetdə tanış olduqları şəxslərə etibar etmədikləri və onların özlərini olduğundan fərqli göstərə biləcəyindən narahat olduqları qeyd olunur.
Mütəxəssislər belə tanışlıqlarda şəxsi məlumatların qorunmasına, qarşı tərəfin davranışlarına və sərhədlərə hörmət edib-etməməsinə diqqət yetirməyi vacib sayırlar. Qarşı tərəfin şəxsi məlumat, foto və ya başqa özəl məzmun tələb etməsi, təzyiq göstərməsi, münasibəti gizli saxlamağa məcbur etməsi və ya nəzarət etməyə çalışması ciddi xəbərdarlıq siqnallarıdır.
Sosial şəbəkələr münasibətləri yaxınlaşdıra bildiyi kimi, qısqanclıq və nəzarət problemlərinə də səbəb ola bilər.
Beləliklə, sosial şəbəkədə tanış olmaq artıq həyatın adi hissələrindən birinə çevrilsə də, münasibətin uğurlu olması platformadan deyil, tərəflərin bir-birinə münasibətindən, dürüstlükdən, hörmətdən və təhlükəsiz ünsiyyətdən asılıdır
Şahanə Ziyad
