Qəzza zolağında hazırda yalnız qismən fəaliyyət göstərən 17 xəstəxanada 2 milyonluq əhali üçün cəmi 1500 çarpayı mövcuddur.
AZXEBER.COM xarici mediaya istinadən xəbər verir ki, bu barədə Ümumdünya Səhiyyə Təşkilatının (ÜST) Fələstin üzrə nümayəndəsi Rik Peeperkorn açıqlama verib.
Peeperkorn qeyd edib ki, qlobal gündəmin İsrailin İrana hücumu ilə başlanan toqquşmalara yönəlməsinə baxmayaraq, Qəzzaya qarşı hücumlar da davam edir. "Səhiyyə sistemi iflas həddindədir. Qəzzadakı 36 xəstəxanadan yalnız 17-si hazırda qismən fəaliyyət göstərir. Bu xəstəxanalarda isə 2 milyonluq əhali üçün cəmi 1500 çarpayı var,” – deyə o vurğulayıb.
O, həmçinin Qəzzanın şimalında yerləşən bütün xəstəxana və səhiyyə mərkəzlərinin fəaliyyətini dayandırdığını bildirib.
Peeperkorn əlavə edib ki, Qəzza ərazisinin 80 faizindən çoxu İsrailin verdiyi "təxliyə əmrləri” altında qalır. Tibb ləvazimatlarının kritik səviyyədə azaldığını bildirən nümayəndə, mövcud ehtiyatların 50 faizindən çoxunun artıq tükəndiyini qeyd edib.
"Qəzzaya 100 gündən artıqdır ki, heç bir yanacaq daxil olmayıb və təxliyə zonalarından ehtiyatları götürmək cəhdləri rədd olunub. Yanacaq çatışmazlığı su və sanitariya xidmətlərinə də mənfi təsir göstərəcək. Bu isə səhiyyə müəssisələrində infeksiyaların qarşısının alınmasına və nəzarətə, həmçinin Qəzzada yayılmış xəstəliklərin daha da pisləşməsinə səbəb olacaq,” – deyə Peeperkorn əlavə edib.
