“Son zamanlar bir çox dövlətlər özünün davamlı inkişaf konsepsiyalarını hazırlayıb və bu çərçivədə müəyyən inkişaf proqramları yaradıblar”. APA-nın xəbərinə görə, bunu Strateji Araşdırmalar Mərkəzinin direktoru Fərhad Məmmədov Bakıda keçirilən Ombudsmanların XI konfransının ikinci günündə çıxışı zamanı deyib. O bildirib ki, hər bir proqramın həyata keçirilməsi maliyyə resurslarının olmasını tələb edir və strateji araşdırma mərkəzləri doğru və müvafiq maliyyə mənbələrinin seçilməsi üçün öz tövsiyələrini verə bilər: “Ayrı-ayrı ölkələrin strateji araşdırmalar mərkəzlərinin əməkdaşlığı, onların birgə fəaliyyəti, fikir mübadilələri bu prosesi daha da sürətləndirir. Həm də ölkələrin iqtisadi, siyasi, sosial və mədəni baxımdan bir-birilərinə inteqrasiya olması strateji araşdırmalar mərkəzlərinin birgə fəaliyyətini zəruri edir. Bu zaman əldə olunan nəticələr də daha effektiv olacaq və biz davamlı inkişafın təmin olunması üçün ən uyğun proqramların hazırlanmasına nail olacağıq”.

F. Məmmədovun sözlərinə görə, davamlı inkişaf dedikdə elə inkişaf başa düşülür ki, o inkişaf tipi indiki nəsillərin tələbini ödəyir və gələcək nəsillərin tələbənin ödənilməsini də təhlükə altına almır. O qeyd edib ki, Davamlı İnkişaf Konsepsiyasının əsas ideyası sosial-iqtisadi və ekoloji inkişafın qarşılıqlı bağlılığı üçün şərait və mexanizmlərin yaradılması, təbii mühitin problemlərinin sosial-iqtisadi proseslərlə vəhdətdə baxılmasıdır.

SAM-ın direktoru hesab edir ki, müasir dövrdə beyin mərkəzlərinin rolu dəfələrlə artıb: “Beyin mərkəzləri elm və siyasət arasında bir körpüdür. Beyin mərkəzi olaraq strateji araşdırma mərkəzləri dövlətlər və onların cəmiyyətləri arasında güvənli bir bağlantı rolunu oynayırlar. Onlar ilk olaraq insanları müəyyən formada maarifləndirməlidirlər. Çünki dayanıqlı inkişafın əsasında birinci növbədə insan kapitalı durur və bu gün dünya ölkələri çoxillik davamlı inkişaf proqramlarını hazırlayaraq qəbul ediblər. Strateji araşdırma mərkəzlərinin əsas məqsədlərindən biri də bu proqramlar çərçivəsində insan kapitalını yetişdirməkdir. Yaşı az olmasına baxmayaraq, Strateji Araşdırmalar Mərkəzi 2013-cü ildə Pensilvaniya Universitetinin reytinq sorğusuna əsasən dünyanın öndə gedən beyin mərkəzləri sırasında göstərilib”.