Ermənistan baş naziri Nikol Paşinyan Soçidə Rusiya sülhməramlılarının xidmət müddətinin 10-15 il uzadılmasına dair sənədi imzalamağa hazır olduğunu bildirib.
O, həmçinin, qeyd edib ki, bu qərarı tək verə bilməz, çünki qərarlar üçtərəfli formatda qəbul olunur.
Bəs Paşinyanın bu cür fikirə düşməsinə nə səbəb olub? Bu haqda sənədin imzalanması nə dərəcədə realdır?
Milli Məclisin deputatı Fəzail Ağamalı AZXEBER.COM-a açıqlamasında məsələyə münasibət bildirib.
O, qeyd edib ki, Paşinyan burnunu belə şeylərə soxmalı deyil:
"Paşinyan yenə də öz ampluasındadır. Hiyləgər və məkrli fikirlərini ən müxtəlif platformalarda ortaya qoymaqda və olduqca primitiv manevrlər etməkdədir. Kollektiv Təhlükəsizlik Müqaviləsi Təşkilatının son iclasında rəzil vəziyyətə düşən Paşinyan Rusiyanın ortaya qoymuş olduğu planın 31 sentyabrda üçtərəfli görüşdə imza atacağına belə razılıq verdiyini dilə gətirdi. Bu cür sülhməramlıların 10-15 il müddətində Azərbaycan ərazisində qalmasının deyilməsi fikrini mən hələ eşitməmişəm, amma əgər belə fikir söyləyibsə, bilməlidir ki, bu sülhməramlılar Azərbaycan ərazisindədir və bunun da Paşinyana dəxli yoxdur. Paşinyan burnunu belə şeylərə soxmalı deyil".
Deputat həmçinin qeyd edib ki, Paşinyan təcavüz siyasəti davam etdirməyə çalışır:
"O, çalışır ki, başqa bir formada Köçəryanın, Sarkisyanın həyata keçirmiş olduğu təcavüzkar və işğalçı siyasətini gələcəkdə davam etdirə bilsin. Bunun üçün o, Fransa ilə, İranla əlaqələr qurmağa çalışır, artıq bu kommunikasiyalar mövcuddur. İndi Rusiyaya daha çox yaltaqlanaraq onun dəstəyini almağa səy göstərir. Əlbəttə, Putinin bu cür planı qətiyyən Azərbaycan dövlətinin maraqlarına uyğun deyil. Dəfələrlə cənab Prezident söyləyib ki, Qarabağ məsələsi bitib. Həqiqətən, bu məsələ bizim övladlarımızın verdiyi qanla, canla başa çatıb. Ona görə də hansı platformalardan deyilməsindən asılı olmayaraq, Azərbaycanda Qarabağ problemi olmayacaq. Bu problem olmayandan sonra sülhməramlı qüvvələr də olmayacaq. Mən buna tamamilə əminəm. Niyyət Rusiya ilə Azərbaycan arasındakı münasibətləri kəskinləşdirmək, Rusiyanın diqqətini özündən yayındıraraq, Azərbaycanın üzərinə istiqamətləndirməkdir".
"Azərbaycan dövləti, onun müzəffər Ali Baş Komandanı cənab Prezident qarşıya qoymuş olduğu hədəflərə çatmaq iqtidarındadır. Bizim güclü dövlətimiz, güclü ordumuz, qardaş Türkiyə kimi müttəfiqimiz var. Nəzərə alsaq ki, İsrail və Pakistan da Azərbaycanın yanındadır, ona görə də bu müttəfiqliyin qarşısında heç bir şəkildə nə ermənisi, nə onun arxasında duran Rusiyası, İranı, Fransası Azərbaycana qarşı müəyyən etmiş olduqları məkrli planı yerinə yetirə bilməyəcəklər. Azərbaycanın qarşıya qoyduğu məqsədlərin yerinə yetirilib tamamlanması da çox uzaqda deyil" - deyə deputat əlavə edib.
Qeyd edək ki, oktyabrın 31-də Soçidə Azərbaycan, Rusiya və Ermənistan liderlərinin üçtərəfli görüşü baş tutacaq.
Aydın Nuri
