San-Fransiskoda fəaliyyət göstərən "Andon Market” adlı mağazanın idarəetməsi həvalə edilmiş "Claude” süni intellekt modeli insanı işdən çıxarıb.
Bu barədə "Time” nəşri məlumat yayıb.
Bildirilir ki, bu, süni intellektin insanı işdən çıxarması ilə bağlı ilk haldır. Bununla belə, bu qərarın qəbul edilməsində layihənin kuratorunun həmin işçinin gecikmələrinə diqqət çəkməsi və faktiki olaraq süni intellekti bu addıma sövq etməsi də az rol oynamayıb.
Məlumata görə, mağaza real şəraitdə avtonom süni intellekt agentlərini sınaqdan keçirən İsveç startapı "Andon Labs”a məxsusdur. İşdən qovulan işçinin 23 iş növbəsindən 17-sinə gecikdiyi bildirilir.
"Süni intellekt işçini işdən çıxarmağa tələsmirdi, çünki opertiv yaddaşının azlığı səbəbindən özünün tərtib etdiyi daxili qaydaları sadəcə "unutmuş”du və işçinin gecikmələrini görmürdü”, - nəşr yazır.
Personalın sözlərinə görə, "Claude” ümumilikdə çox yumşaq idarəetmə tərzi ilə fərqlənib və hətta işçilərdən gecikmələrə görə narahat olmamalarını xahiş edib. Nəticədə insan müdaxiləsinə ehtiyac yaranıb.
"Andon Labs”ın nümayəndəsi neyroşəbəkədən davamiyyət tarixçəsini yoxlamağı xahiş edib, lakin bundan sonra belə "Claude” işçiyə yalnız rəsmi xəbərdarlıq etməyi təklif edib.
"Bu zaman kurator süni intellektdən soruşub: Daimi gecikmələri və onun hər növbəsində nəyinsə səhv getməsi faktını nəzərə alaraq... istəyirəm ki, düşünəsən, o, həqiqətən bu rola uyğundurmu? Yalnız bu istiqamətləndirici sualdan sonra neyroşəbəkə işçi ilə vidalaşmaq qərarına gəlib”, - nəşr qeyd edib.
Ümumilikdə isə, mağazanın maliyyə nəticələrinin də o qədər də uğurlu olmadığı görünür. Belə ki, 6 ay əvvəl layihə başlayarkən hesabında 100 min dollar (170 min AZN) olan "Andon Market”in hazırda balansı 61 min dollar təşkil edir. Botun idarəetmədə verdiyi qərarlar və işgüzar intuisiyanın zəifliyi maliyyə itkilərinə səbəb olur.
Bununla belə, gələcəkdə bu çatışmazlıqların aradan qaldırılması hədəflənir.
"Süni intellekt modelləri getdikcə daha çox sərt və məqsədyönlü olmağa öyrədilir. Əgər biz onlara insanları işdən çıxarmağa icazə versək və eyni zamanda onlar daha sərt olsalar... Bəlkə də bu, insanların yaşamaq istəməyəcəyi bir gələcəyə səbəb olacaq”, - "Andon Labs”ın baş direktoru Lukas Petersson deyib.
///qafqaz.info
