Son dövrlərdə süni intellekt və süni zəka texnologiyaları misilsiz sürətlə inkişaf edir. Artıq bir neçə il öncə xəyallarda belə canlandırmaq çətin olan alqoritmlər bu gün bir neçə kliklə böyük nəticələr yarada bilir. Bu texnologiyaların inkişafı nəticəsində insan əməyinə ehtiyac azalmış, bir çox sahələrdə məhsuldarlıq artmış, yaradıcılıq imkanları isə hər kəs üçün əlçatan olmuşdur.
Xüsusilə video və vizual kontent sahəsində bu dəyişiklik daha aydın hiss olunur. Bir vaxtlar sadə bir animasiya və ya qrafik video hazırlamaq üçün 3D Max və oxşar mürəkkəb proqramlarda günlərlə çalışan mütəxəssislərə ehtiyac var idi. İndi isə süni intellekt əsaslı alətlər, bir neçə cümləlik təsvirlərlə istənilən səhnəni canlandıra bilir.
Proqramların istifadəsi sadələşib, interfeyslər daha əlçatan olub. Bu o deməkdir ki, artıq hər bir gənc, texniki biliyi olmadan belə, öz ideyasını görüntüyə çevirə bilər.
Lakin bu imkanlar həm də bir sual doğurur: bu gücdən necə istifadə edirik?
Təəssüf ki, reallıq göstərir ki, bir çox gənclər bu texnologiyanı cəmiyyətə fayda vermək və ya mənəvi dəyərləri təbliğ etmək əvəzinə, sırf diqqət və reytinq naminə yanlış istiqamətlərə yönəlirlər. Maarifləndirici, sosial mesajlı və milli-mənəvi dəyərləri təbliğ edən videoçarxlar hazırlamaq əvəzinə, süni intellekt vasitəsilə vaxtilə sosial şəbəkələrdə trend olmuş, lakin vulqar ifadələrlə dolu videolar yenidən dirçəldilir. Bu kontentlər manipulyasiya olunaraq izləyici cəlb edir, lakin əslində, mənəviyyatımıza zərbə vurur.
Burada sosial platformaların alqoritmlərinin də böyük rolu var. Təəssüf ki, bu alqoritmlər maarifləndirici və mənəvi dəyərləri təbliğ edən məhsulları ön plana çəkməkdə zəifdir. Əksinə, vulqar davranışların, sensasiya yaradan və asan izlənən kontentlərin qarşısını açır, onları daha çox istifadəçinin qarşısına çıxarır. Nəticədə, artıq biz sosial platformaları idarə etmirik, əksinə sosial platformalar bizi idarə etməyə başlayır.
Unutmayaq ki, texnologiya özü-özlüyündə nə yaxşıdır, nə də pis. Onu hansı məqsədlə istifadə etdiyimiz önəmlidir. Süni intellekt əgər doğru istiqamətə yönləndirilərsə milli dəyərlərimizi təbliğ edən, tarixi şəxsiyyətlərimizi tanıdan, təhsil və maarifçilik sahəsində inqilabi yeniliklər yaradan bir gücə çevrilə bilər. Əks halda, bu texnologiya yalnızca səthi məzmun, mənəviyyatdan uzaq trendlər və süni reytinqlə dolu bir boşluğa çevriləcək.
Bu günümüzün əsas çağırışı budur: texnologiyanı dəyərə çevirmək. Gənclərimizi bu imkanlardan düzgün istifadə etməyə təşviq etməli, onlara doğru örnəklər göstərməliyik. Süni intellekt gələcəyin mühüm alətidir, amma gələcəyin özünü formalaşdıracaq olan insan düşüncəsi və məsuliyyətidir.
Səməndər Niftəliyev,
Sosial media üzrə mütəxəssis
