Bu gün Bakı İstintaq Təcridxanasında Taleh Bağırovun iştirakı ilə onun və digərlərinin barəsində olan cinayət işi ilə bağlı istintaqın yekunlaşması elan olunub.
AZXEBER.COM xəbər verir ki, bu haqda Modern.az-a T.Bağırovun hüquqlarını müdafiə edən Cavad Cavadov məlumat verib.
Vəkilin sözlərinə görə, hazırda iş materialları ilə tanış olunmasına başlanılıb:
“Taleh Bağırovun nədə ittiham olunması müdafiə tərəfinə aydın deyil və onun son təqsirləndirilən şəxs qismində cəlbetmə qərarı üç səhifədən ibarət olmaqla qərarın təsviri-əsaslandırıcı hissəsibir cümlədən ibarətdir. Yəni cümlə üç vərəqdən ibarətdir və bununla da istintaqın hansı fikri çatdırmaq istədiyini anlamaq olmur".
C.Cavadov müvəkkilinin ailə üzvlərilə görüşünə icazə verilmədiyini deyib: “Bu gün həmçinin Taleh Bağırovun bildirdiyinə görə onunla görüşə gələn ailəsinə görüş verilməyib. Onları səhər bir neçə saat gözlətdikdən sonra naməlum səbəbdən görüş verilməsindən imtina edilib. Bu barədə rəsmi müraciətlə təcridxana rəhbərliyinə müraciət edəcəyik”.
Xatırladaq ki, Daxili İşlər Nazirliyi 2015-ci il noyabrın 26-da Bakı şəhərinin Nardaran qəsəbəsində xüsusi əməliyyat keçirilib. Əməliyyat zamanı polis əməkdaşlarına silahlı müqavimət göstərilərək avtomat silahlardan atəş açılıb, əl qumbarası atılıb. Hücum edənlərin davamlı atəşinə cavab olaraq xüsusi əməliyyat qrupu tərəfindən xidməti silahdan istifadə edilməklə cinayətkar dəstənin 4 üzvü məhv edilib, daha bir neçə nəfəri yaralanıb. Əməliyyatın keçirildiyi ərazidə silahlı cinayətkar dəstənin tərəfdarlarının çoxalmasına baxmayaraq, polis işçiləri öz xidməti vəzifələrini sonadək mərdliklə yerinə yetirib, 2 əməkdaş qəhrəmancasına həlak olub. Hadisə yerindən maddi sübut kimi xeyli sayda avtomat silah, əl qumbarası, soyuq silahlar və s. götürülüb. Cinayətkar dəstənin, Taleh Bağırov başda olmaqla, 14 üzvü saxlanılaraq istintaqa təqdim edilib.
T.Bağırov barəsində dörd ay müddətinə həbs qətimkan tədbiri seçilib. O, Cinayət Məcəlləsinin 120.2.1-ci, 120.2.3-cü, 120.2.4-cü, 120.2.7-ci, 120.2.12-ci, 29, 120.2.1-ci, 29, 120.2.3-cü, 29, 120.2.4-cü, 29, 120.2.7-ci, 29, 120.2.12-ci, 28, 214.2.1-ci, 28, 214.2.3-cü, 214-2-ci, 220.2-ci, 228.3-cü, 278-ci, 279.1-ci, 283.2.3-cü və 315.2-ci maddələri ilə ittiham olunur.
Aprelin 7-də Nəsimi Rayon Məhkəməsində T.Bağırov barəsində seçilmiş həbs qətimkan tədbirinin müddəti 3 ay uzadılıb.
Məhkəmə qərarından apellyasiya şikayəti verilib. Bakı Apellyasiya Məhkəməsi şikayəti təmin etməyib.
Daha sonra Taleh Bağırova yekun ittiham elan olunaraq onun ittiham edildiyi 214-cü (terrorçuluq) maddə 28, 214-cü (terorçuluğa hazırlıq) maddəsinə töfsif olunub.
