"Ayıbdır, qəpik söhbəti və vay-şüvənliyi edirsiz. Avropa Oyunlarının bu məsələyə nə dəxli var? Vətəndaşı qoymusuz "detdom" uşağının yerinə. 2007-dən sonra işıq puluna baxılmamışdı, indi 1 qəpik artırıblar, gətirdiyiniz arqumentlərə baxın. Dünyanın hansı ölkəsində bu qiymətə işıq pulu var?! Göstərin mənə. Bu yalnız Azərbaycanda belədir, Dəhşətsiz siz"
İqtisadçı eyni zamanda vətəndaşları da qınayıb: "Ayda təxminən, 15 manat işıq pulu verən ailə indi 2 manat 50 qəpik bundan artıq verməli olacaq. Bu gün istirahət üçün gəldiyim dağ kəndinin mərkəzində bir 79 yaşla qoca ilə dərdləşirdim - 150 azn pensiyası aldığına görə hökumətdən bərk giley-güzar edərək, siqareti siqaretə calayırdı. Sözararası soruşdum ki, günə nə qədər çəkirsən ?! Cavabı bu oldu ki, biri 2 manat 80 qəpikdən olmaqla günə bəzən, 3 "paçka !"
Qeyd edək ki, təsdiq edilmiş yeni tariflər region ölkələrindəki faktiki tariflərlə müqayisədə aşağı səviyyədədir
2016-cı il 14 iyul tarixində Azərbaycan Respublikası Tarif (qiymət) Şurasının növbəti iclası keçirilmişdir. İclasda “Azərişıq” Açıq Səhmdar Cəmiyyətinin və “Azərenerji” Açıq Səhmdar Cəmiyyətinin müraciətləri nəzərə alınaraq elektrik enerjisinin ölkədaxili tariflərinin tənzimlənməsi barədə qərar qəbul edilmişdir.
Məlum olduğu kimi, sonuncu dəfə elektrik enerjisinin tarifi 2007-ci ilin yanvar ayında dəyişdirilmişdir. Ötən 10 ilə yaxın müddət ərzində istehsal güclərinin artırılması, paylayıcı şəbəkələrin genişləndirilməsi, itkilərin azaldılması, enerji təchizatının davamlılığının təmin edilməsi üçün böyük həcmdə investisiya qoyulmuş və xidmətin keyfiyyəti əhəmiyyətli dərəcədə yüksəlmişdir. İstehsalçının və paylayıcı şəbəkənin balansına xeyli tikili, qurğu, ötürücü qurğu, maşın və avadanlıqlar qəbul edilmişdir ki, bu da saxlanma və təmir xərclərinin artımını şərtləndirmişdir.
Son 10 ildə enerji sisteminin istehsal gücü 5590 meqavatdan 7160 meqavata çatdırılmış, abonentlərin sayı təxminən 1 milyona yaxın artaraq 2,5 milyonu ötmüşdür. Qeyd edək ki, əhali qrupu üzrə abonentlərin sayğacla təmin edilməsi ödənişsiz olaraq paylayıcı şəbəkə tərəfindən həyata keçirilir.
Bu illər ərzində transformatorların, elektrik avadanlıqları və komplektləşdirici vasitələrin, digər xammal və materialların qiymətlərində ciddi artım müşahidə edilmişdir. Bununla yanaşı, elektrik stansiyalarının və paylayıcı şəbəkələrin normal istismar vəziyyətində saxlanılması və artan elektrik enerjisi tələbatının ödənilməsi üçün irihəcmli investisiya qoyuluşları tələb olunur.
Enerji təchizatında dayanıqlılığın və keyfiyyətli xidmətin davamlılığının təmin edilməsi, istehsalçının və paylayıcı şəbəkənin maliyyə asılılığının azaldılması və perspektiv inkişafı məqsədilə bir kilovat-saat elektrik enerjisinin topdansatış tarifi 4,3 qəpik, pərakəndə satış tarifi isə 7 qəpik müəyyən edilmişdir.
Təsdiq edilmiş yeni tariflər region ölkələrindəki faktiki tariflərlə müqayisədə aşağı səviyyədədir.
Tarif tənzimləməsindən sonra əldə ediləcək gəlir müvafiq subyektlərin dövlət büdcəsindən asılılığının azaldılmasına, bu sistemdə çalışan 18 mindən artıq işçinin əmək haqlarının artırılmasına imkan verəcək.
Yeni tariflər 2016-cı il 15 iyul tarixindən qüvvəyə minəcəkdir. Bu tarixədək istehlak olunan elektrik enerjisinə görə yaranan borclar əvvəlki tariflə ödəniləcəkdir.
Qərar Tarif (qiymət) Şurasının rəsmi internet saytında (www.tariff.gov.az) yerləşdirilmişdir.
