Son dövrlər xanımların istifadə etdikləri kosmetik məhsulların keyfiyyəti ilə bağlı redaksiyamıza çoxsaylı oxucu məktubları gəlir. Oxucularımızdan Nərmin Əliyeva redaksiyamıza ünvanladığı məktubda kosmetik məhsulların keyfiyyəti ilə bağlı narahatçılığını bildirib: “Mən 1 ildir ki, eyni kosmetik vasitələrindən istifadə edirəm. Məni narahat edən məsələ isə istifadə etdiyim məhsulların müddətidir. Bilmək istərdim ki, eyni kosmetik vasitələri 1 ildən çox istifadə etmək olarmı? Çünki kosmetoloqlar tərəfindən hələ bu barədə bir açıqlama eşitməmişəm. Bu vasitələri neçə aydan bir dəyişmək lazımdır?”

Məsələ ilə bağlı AZXEBER.COM portalı tanınmış kosmetoloq Nigar İbrahimovadan müsahibə alıb.

- Nigar xanım, kosmetik vasitələrdən düzgün istifadə hansı şəkildə olmalıdır?

-Ümumiyyətlə, tonal krem, pudra, tuş, dodaq boyası kimi kosmetik vasitələri heç olmasa 6 aydan bir dəyişmək lazımdır. Bəzi markalar vardır ki, onlar hətta alındıqdan 2 ay sonra pis qoxu yaradır. Bu vəziyyətdə həmin vasitədən istifadə etmək olmaz. Əsas diqqət edilməli məsələlərdən biri də başqalarının tuş, blesk və ya ənliyindən istifadə etmək olmaz. Bu yolla hər hansı bir xəstəliyi özümüzdə bilmədən yaya bilərik. Tuşdan göz kipriklərinə istifadə zamanı tuşun qapağını yaxşı bağlamaq vacibdir. Alındıqdan 2 ay sonra təzə dəmlənmiş çaydan 2 damcı götürüb tuşa damlatmaq lazımdır. Bu zaman həm tuşdakı quruluğun, həm də mikrobların çoxalmasının qarşısını almış olacağıq.

Göz qələmlərindən isə hər bir xanım individual olaraq istifadə etməlidir. Baxmayaraq ki, qələmin ucu hələ təzə təmizlənib və itidir. Hər istifadədən sonra bir daha qələmin ucunu təmizləmək lazımdır.

Pudrayla bağlı məsləhətim ondan ibarətdir ki, bu kosmetik vasitədən çox istifadə olunmasa daha yaxşı olar. Çünki pudra insanın üz dərisini qurudur.

Tonal kremlər isə son zamanlar xanımlarda daha çox problemə çevrilib. Belə ki , istənilən markanın tonal kremindetən istifadə etmək olmaz. Həmçinin, tonal krem üzün böyük bir hissəsinə çəkildiyi üçün xanımlar əsasən bu vasitədən doğru –düzgün istifadə etməyə çalışırlar. Həm də onu deyim ki, bu onlarda yaxşı alınmır.

- Nigar xanım, tonal kremlərin istifadəsi ilə bağlı müxtəlif fikirlər səslənir. Siz bu barədə nə deyə bilərsiniz?

-Əvvəlcə üzə neytral baza vurulmalıdır. Daha sonra tonal kremdən istifadə etmək olar. Ümumiyyətlə yaxşı olar ki, xanımlar üz dərisindən 1 ton açıq olan tonal kremdən istifadə etsinlər.Çünki üzdə qaldıqca o tündləşir. Həftədə heç olmasa 1 dəfə nəmləndirici, qidalandırıcı maskalardan istifadə etmək lazımdır.

- Hansı markaları xanımlara məsləhət görmürsünüz?

-“Pupa”, “Jade”, “Pastel”, “Maybelline” kimi markaların kosmetik vasitələrini xanımlara məsləhət görmürəm. Xüsusən üz dəriləri həssas olan xanımlar bu vasitələrdən istifadə ediblərsə mənimlə tam razılaşacaqlar. Həmçinin, xanımlara bir xoş xəbər də verim ki, artıq keyfiyyətli məhsullarla daha asan təmin ediləcəklər.

- Nigar xanım, bir kosmetoloq kimi, hansısa bir dünyaca məşhur brendi Azərbaycana gətirməyi düşünürsünüzmü?

- Hazırda danışıqlar başa çatmasa da onu deyim ki, Azərbaycanda ilk böyük “MAC”, “Make Up For Ever”, “Kryolan” kosmetik vasitələrinin satışını həyata keçirəcək mağazanın açılmasına çalışıram. Güman ki, bu işdə xanımlar da bizim qədər maraqlı olacaqlar.

Gülnarə BAYRAMOVA