AZXEBER.COM portalı tanınmış müğənni, Ayaz Qasımovun portalımıza verdiyi müsahibəni təqdim edir.
- Ayaz, sizi efirlərdə daha az görürük. Buna səbəb nədir?
- Doğrudur, tamaşaçılar 2011-ci ildə efirdə məni daha az görürdülər. Ancaq bu il tənbəlliyin daşını atmışam. Yəqin bu belə də davam edəcək.
- El şənliklərində daha çox olduğunuz üçün efirlərə vaxtınız qalmır?
- Səbəb tək o deyil. Bildiyiniz kimi, mən ailəliyəm və vaxtımın çox hissəsini ailəmə həsr edirəm. Övladımız dünyaya gəldikdən sonra bir müddət Bakıda olmadım. Amma siz dediyiniz səbəb də daha çox buna təsir edir. Hər gün 6 saat oxumaq müğənni üçün çox çətin bir işdir.
- Yaxın zamanlarda hər hansı bir yenilik olacaqmı?
- İnşallah, sözləri Xanım İsmayılqızının olan və musiqisi Aygün Səmədzadəyə məxsus “Neyləyək şəhər ikimizindir” adlı mahnı artıq radiolarda səslənir. Bu mahnıya klip də çəkdirmək istəyirəm. Daha sonra öz saytımı yeniləmək fikrim var. Bir də Azad İsayev mənə “Sevgilimi istərəm” adlı mahnını hədiyyə edəcəyini söyləyib. Bildiyiniz kimi, o Röyaya öz mahnılarını oxumağı qadağan edib.
- Sizcə, Azad İsayevin hədiyyə edəcəyi klip söz olaraq qala bilərmi?
- Azad İsayev mənim ən yaxın dostlarımdan biridir. Onunla yaxşı münasibətimiz var. Mən əvvəlcə təklif etdim ki, bu mahnıya klip çəkdirək, ancaq o mahnını mənə hədiyyə edəcəyini bildirdi. Bu işin alınıb-alınmayacağını isə zaman göstərəcək.
- Ayaz, bir çox həmkarlarınız klip çəkdirərkən xarici rejissorlara üz tuturlar. Siz bu haqda fikirləşirsinizmi?
- Mən bu günə qədər nə etmişəmsə, öz gücümə etmişəm. Ümumiyyətlə böyük danışmağı xoşlamıram. Xarekterim belə deyil. Hazırda öz peşəkar rejissorlarımız var: Ülviyyə Könül, Aqil M. Quliyev, Fuad Əlişov və digərləri. Problem sadəcə ondan ibarətdir ki, bizim rejissorlar müğənnilərin qabağına çox böyük rəqəm qoyurlar. Ona görə onlar xaricə üz tutub, orada eyni qiymətə daha yaxşı klip çəkdirə biləcəklərinə inanırlar. Mən öz adımdan deyim ki, yerli rejissorlarla işləməyə daha çox üstünlük verirəm.
- Solo konsert haqqında düşünürsünüzmü?
- Sentyabr ayında Heydər Əliyev sarayında konsert verəcəm. Düşünürəm ki, məni sevənlər yay istirahətinin ardından konsertə üz tutacaqlar. - Müğənnilikdən başqa biznesiniz varmı?
- Xeyir yoxdur. Ancaq bu da yaxın zamanlarda planlarım arasındadır.
- Müğənni həmkarlarınızla münasibətləriniz necədir?
- Mən dalaşqan insan deyiləm (gülür). Mənim heç kəslə problemin yoxdur. Başımı aşağı salıb öz işimi görürəm.
- Siz özünüzü necə müğənni kimi görürsünüz?
- Şişirdilmə populyarlıqla üzə çıxmayan, sənətiylə gündəmə gələn, populyar olan.
- Sonda öz sevənlərinizə nə deyə bilərsiniz?
Sonda məni sevən hər kəsə təşəkkür edirəm. Onlar demək istəyirəm ki, 2012-ci ildə məni daha çox dinləyəcəklər. Portalınıza isə uğurlar arzu edirəm. Güləsər Qasımova
