Türkiyədə bir neçə ildir davam edən “Ergenekon” istintaqında gizli şahid kimi dindirilən PKK terror təşkilatının 2-ci adamı Şemdin Sakık kod adı “Yeşil” olan tanınmış kəşfiyyatçı Mahmud Yıldırımın öldüyünü bildirib. Sakık 2001-ci ildə Diyarbəkirdən havaya qalxan, içində desantların olduğu təyyarənin Malatyada qəzaya uğradığını xatırladaraq Yıldırımın da həmin təyyarədə olduğunu və öldüyünü iddia edib. Terrorçu lider həmçinin həmin təyyarədə olan 2 nəfərin qələminin dövlət tərəfindən sındırıldığını və onlardan birinin Mahmud Yıldırım olması barədə məlumata sahib olduğunu deyib. Şemdin Sakık 1998-ci ildə Şimali İraqda onu ələ keçirən 5 nəfərlik türk kəşfiyyatçı qrupuna “Yeşil”in rəhbərlik etdiyini də əlavə edib.Xatırladaq ki, millətçi düşüncəyə sahib Mahmud Yıldırım cavan yaşlarından etibarən jandarma komandirliyi tərəfindən bəzi əməliyyatlarda istifadə olunub. Hərbi xidmətdən sonra isə MİT-in (Milli İstixbarat Təşkilatı) tərkibində fəaliyyətə başlayıb. Kod adının “Yeşil” olmasının səbəbi isə üzv olduğu təşkilat adına PKK-da fəaliyyət göstərdiyi vaxt təhlükəsizlik qüvvələri tərəfindən terrorçulardan ayrıd edilməsi üçün boynuna bağladığı yaşıl şərf olub.1996-ci ildə Türkiyənin gündəmini dəyişdirən “Susurluk” qəzasından sonra dövrün baş naziri Məsud Yılmaz tərəfindən öldüyü bildirilsə də müxtəlif vaxtlarda mətbuatda onun ölməsi və ya həyatda olması barədə xəbərlər yayılıb.
