Pedaqoq-yazıçı İbrahim Evirgen "Life Academy” ilə Təhsil Forum Platforması tərəfindən Bakıda təşkil olunacaq Beynəlxalq Təhsil Forumuna məruzəçi kimi dəvət olunub.
AZXEBER.COM xəbər verir ki, mayın 12-də keçiriləcək "Beynəlxalq Təhsil Forumu” adlı tədbirdə İbrahim Evirgen təhsil sistemimiz haqqında təqdimatla çıxış edəcək.
30 ildən çoxdur ki, müxtəlif təhsil ocaqlarında ingilis dilindən dərs dediyini bildirən İbrahim Evirgen Beynəlxalq Təhsil Forumuna dəvət olunduğuna görə məmnunluğunu dilə gətirib:
"İllərdir müxtəlif təhsil ocaqlarında ingilis dilindən dərs deyirəm. Bir müddət Dəclə Universitetinin Təhsil fakültəsinin ingilis dili bölməsində müəllim kimi dərs dedim. Bu mövzuda çoxlu köşə yazıları yazmışam. Elə məhz bu müddət ərzində əldə etdiyim təcrübə, bilik və bacarıqları azərbaycanlı qardaşlarımla bölüşəcəm.
Xüsusilə, Türk Təhsil Sistemi, eləcə də tələbələrə psixoloji yanaşma, müəllim-şagird münasibətləri, şagirdlərin uğurlarının artırılmasının yolları, məktəbəqədər təhsilin əhəmiyyəti və s. haqqında ingilis dilində təqdimatla çıxış edəcəm.
Çoxlu sayda tələbə, müəllim, akademik və yüksək səviyyəli idarəçilərin qatılacağı tədbir iki dost və qardaş ölkə üçün də çox önəmlidir. Bizi dəvət etdiklərinə və çıxış etmək imkanı yaratdığına görə "Life Academy” Təhsil Platformasının tələbələrinə, müəllimlərinə və müdiriyyətinə xüsusi təşəkkürümü bildirirəm”.
Qeyd edək ki, konfransda yüzlərlə tələbə ilə yanaşı, Sinqapur, Çin, Finlandiya və Azərbaycandan olan bir çox ekspertlər iştirak edəcək.
