3 il öncə avtomobil qəzasına düşərək yataq xəstəsi olan Xalq artisti Teymur Mustafayevin (Teymur əmi) adını daşıyan nəvəsi Teymurun köməyə ehtiyacı var.
Qəzadan sonra ağır onurğa beyin travması səbəbilə əl və ayaqların hərəkətsizliyindən əziyyət çəkən 31 yaşlı Teymur Mustafayev reabilitasiya kursu keçmək üçün xaricə yollanmalıdır.
Bu haqda onun anası Gülnarə Mustafayeva AZXEBER.COM-a açıqlamasında bildirib.
Onun sözlərinə görə, Teymurun ayağa qalxması üçün 40 min manata ehtiyac var:
"Dünyanın bir çox böyük ölkələrində Teymurun müalicəsi ilə məşğul ola biləcək güclü mərkəzlər var. Amma təəsüflər olsun ki, çox bahadır və o məbləği qarşılamağa bizim gücümüz çatmır. Araşdırmalarıma görə İsraildə, Türkiyədə və Moskvada olan bu mərkəzlərdə müalicə yüz minlərlə manat vəsait tələb edir. Təəssüflər olsun ki, orada müalicə almağımız mümkün deyil. Ona görə də biz Rusiyanın Novosibrsk şəhərində bir mərkəz tapmışıq. Orada Teymurun müalicəsi üçün lazım olan bütün avadanlıqlar var. Qiyməti də digər ölkələrə nisbətən daha münasibdir. Ora gedə bilsək 3 ay reabilitasiya kursu keçməliyik. Bunun üçün də bizə 40 min manat vəsait lazımdır.
Anası qeyd edib ki, Teymurun ayağa qalxa bilməsi üçün az zaman qalıb:
"Onu da deyim ki, Teymurun ayağa qalxa bilməsi üçün artıq 4 il zamanı qalıb. Həkimlərin sözlərinə görə 4 il sonra onu ayağa qaldırmaq mümkün olmayacaq. Çünki sümüklər bərkiyir, deformasiya olur. İmkanı olan şəxslərdən, qurumlardan xahiş edirəm ki, imkan daxilində bizə kömək etsinlər".
Teymura kömək etmək istəyənlər üçün hesab nömrəsi:
5522 0993 4066 8664 (ABB Bank)
Aysel Hacızadə
