Avqustun 21-dən 26-dək Kazan şəhərində, "New Wave Hall” konsert zalında "Yeni Dalğa 2025” beynəlxalq musiqi müsabiqəsi keçirilir.
AZXEBER.COM xəbər verir ki, Azərbaycanı sözügedən müsabiqədə "Səs Azərbaycan" vokal şousunun son mövsümünün ən parlaq iştirakçılarından biri, "Karvan" qrupunun solisti İlqar Xəyalın oğlu Teymur Hənifəyev təmsil edir.
Teymur müsabiqə başlamazdan əvvəl üzləşdiyi çətinliklərdən danışıb:
""Yeni dalğa"ya gedən yolum heç də plan üzrə başlamadı. Fikirləşirdim ki, əvvəlcə məşqlər olacaq. Amma təyyarə Kazana eniş edəndə məlum oldu ki, bu, məşqlər yox, yarımfinaldır. Nə geyimim hazır idi, nə də mahnının sözləri kağızda hazırlanmışdı. Sözləri əzbər bilmədiyim üçün onları əlimə yazıb belə ifa etmək qərarına gəldim.
Bütün bunlara baxmayaraq finala keçdim. Qarşıda final var" deyə Teymur Hənifəyev bildirib.
Xatırladaq ki, Azərbaycan müsabiqənin ikinci turunda 6-cı olaraq çıxış edəcək. 26 avqustda keçirilən final turunda isə qalib müəyyənləşəcək.
Qeyd edək ki, Teymur Hənifəyev "Səs Azərbaycan" da Röya Ayxanın tələbəsi olub.
Ötən il isə Azərbaycanı "Yeni dalğa” festivalında müğənni Anar Ağayev təmsil edib.
O, ilk üçlüyə qədər yüksələ bilmişdi.
Aysel
