Ermənistanlı şahmat ustası Levon Aronyan dövlətin ona qarşı laqeyd münasibətindən bezərək ABŞ-a köçməyə qərar verib.
Bu barədə o, LevitovChess YouTube kanalına müsahibəsində deyib.
"Öz potensialımdan istifadə etməyə çalışmalıyam, ancaq son vaxtlar özümə qarşı, təəssüf ki, laqeydlik görürəm. Prinsipcə, dövlət həmişə mənə kömək edib. Kömək eləməyəndə də, heç olmasa, hörmət göstərirdilər. Mənim sahəmdə nəyinsə qaydasında olmadığını görəndə nəyisə dəyişməyə çalışıram. Burada isə hər dəfə təşəbbüs irəli sürdükcə mənə eyham vururdular ki, mənim rəyimin dəyəri yoxdur", - Aronyan deyib.
Şahmatçı deyib ki, siyasətçi biri deyil, ona isə həmişə elə münasibət göstərilib ki, guya daim nəsə istəyir. Ancaq onun sözlərinə görə, yalnız şahmat və şahmat dünyasının maraqlarını təmsil edib, maliyyə dəstəyinə can atmayıb.
"Əlbəttə, iş pulda deyil. Ondadır ki, daim səni troll edirlər. Deyək ki, hansısa görüşə çağırırlar, özləri isə gəlmirlər, mənim dediklərimi isə keçmiş hökumətin favoritinin fikirləri kimi qəbul edirlər. Yəni mənim dediklərim bu halda düz olmaya bilər, çünki guya mən kiminsə maraqlarını təmsil edirəm. Amma mən öz sahəmin peşəkar maraqlarını təmsil edirəm", - Levon şikayətlənib.
Şahmatçının fikrincə, xaricə köçməyi potensialını reallaşdırmağa imkan verəcək: "Daim özümü şahmata verən insanam. Ona görə də mənə hörmətlə yanaşmalarını istəyirəm, indi isə bunu görmürəm".
Ancaq Ermənistanı tərk etməyin onun üçün ağır olduğunu deyir: "Öz ölkəndə yaşayıb doğma dilində danışmaqdan böyük zövq yoxdur".
Qeyd edək ki, Ermənistan millisinin tərkibində üçqat olimpiya çempionu olan Aronyan "şahmata səriştəsiz dövlət xadimlərinin müdaxiləsi və dövlət tərəfindən şahmata dəstəyin dayandırılması" səbəbindən ABŞ-a köçmək istədiyini deyib.
Bu il yanvarın 3-də azərbaycanlı qrossmeyster Teymur Rəcəbovla Aronyan "Champions Chess Tour” çərçivəsində rapid üzrə onlayn keçirilən "Airthings Masters” turnirinin final mərhələsinin həlledici görüşündə üz-üzə gəlmişdilər. Azərbaycan təmsilçisi 2:1 (0,5:0,5; 1:0; 0,5:0,5) hesabı ilə qələbə qazanmışdı. Martın 13-də isə Aronyan dünya çempionu norveçli Maqnus Karlsenin təşkil etdiyi Çempionlar Turunun IV mərhələsində azərbaycanlı qrossmeyster Şəhriyar Məmmədyarovla görüşüb və ağ fiqurlarla oynamasına rəğmən, mat edilib. // hit.az
