TikTok, qısa və dinamik videoları ilə istifadəçilərin diqqətini cəlb edən, yaradıcı məzmunun asanlıqla viral olmasını təmin edən unikal bir platformadır. Burada əyləncəli, informativ və hətta maarifləndirici kontentlə yanaşı, güldürən və düşündürən komediya videoları da geniş auditoriya tərəfindən böyük maraqla qarşılanır.
Yaradıcılar komediya kontenti yaratmaq üçün müxtəlif üsullardan istifadə edirlər. Bəziləri gündəlik həyatdakı tanış və hamının başına gələn situasiyaları şişirdilmiş formada təqdim edərək insanlara gülüş bəxş edir, digərləri isə ironik və satirik yanaşma ilə sosial məsələləri qabardırlar. Mimikalar, jestlər, bədən dili və səsləndirmə bacarıqları da bu komediya videolarını daha təsirli və yaddaqalan edir.
TikTok-da komediya kontentinin populyarlığının əsas səbəblərindən biri də bu məzmunun çox rahat paylaşılması və kütləvi yayılma potensialıdır. Bu yazıda TikTok-un komediya dünyasında öz fərqli yanaşmaları və orijinal məzmunları ilə məşhurlaşmış dörd yaradıcıdan bəhs edəcəyik.
Bu məşhur yaradıcının 206 mindən çox izləyicisi var və əksər videoları milyonlarla baxış toplayır. O, təkbaşına bir videoda eyni anda 4-5 fərqli obraz yaradır - qoca, gənc, xanım və daha çox. Məhz bu unikal yanaşması onu digərlərindən fərqləndirir və izləyicilərinin sevimlisinə çevirir.
Rəmzi, sosial media platformalarında qazandığı populyarlıq sayəsində artıq peşəkar səhnəyə qədəm qoyub və yüzlərlə tamaşaçı qarşısında ikinci solo konsertinə hazırlaşır.
Onun ilk viral videolarından biri "Buradan N. Nərimanov metrosuna necə getmək olar?" mövzusunda olub. Bu videoda o, altı fərqli obrazı canlandıraraq eyni suala müxtəlif, özünəməxsus və gülməli cavablar verib. Cəmi 22 saat ərzində video 1 milyon baxışı keçib və hazırda 3,2 milyon baxış toplayıb.
Rəmzinin ən çox sevilən obrazlarından biri isə qonşu xaladır. Bu xarakter daim qonşularının qapısını döyərək ya ərzaq, ya da müxtəlif ləvazimatlar istəyir, eyni zamanda da qonşunun oğlu ilə digər qonşuların qeybətini etməyə çalışır. Onun yumor dolu və orijinal məzmunları sizi güldürəcək və əhvalınızı qaldıracaq!
Bir-birindən gülməli və orijinal məzmunları ilə qısa zamanda populyarlıq qazanan bu yaradıcı, izləyicilərin böyük rəğbətini qazanıb. Onun hazırladığı videolar, gündəlik həyatdan götürülmüş, hər kəsin yaşadığı, amma bəzən sözlə ifadə edə bilmədiyi məqamları yumoristik şəkildə təqdim edir. Məzmunlarının altındakı şərhlər də göstərir ki, izləyicilər onun toxunduğu mövzularla tamamilə razılaşır, öz həyatlarında da bu situasiyaları yaşadıqlarını bildirirlər. Bu isə onun auditoriyası ilə səmimi və güclü bir əlaqə qurduğunu sübut edir.
Hesabın paylaşımları xüsusilə yüksək baxış sayı və statistikaları ilə seçilir. Onun ən çox izlənilən videoları arasında ailə üzvləri – xüsusilə analar və atalar haqqındakı yumoristik səhnələr yer alır.
Hesabın indiyə qədər ən yüksək göstərici qazanan videosu isə "Mamaya saxlamaq üçün verdiyin pulu sonra ala bilməmək" mövzusunda olub və 774,7 min baxış sayı toplayıb. Bu video, izləyicilər arasında böyük rezonans doğurub, çünki çoxlarının real həyatda yaşadığı və tez-tez zarafat mövzusuna çevirdiyi bir situasiyanı yumoristik tərzdə təqdim edib.
Cəmi 8 ay əvvəl TikTok platformasında məzmun paylaşmağa başlayan bu yaradıcı, qısa zamanda sürətli yüksəliş əldə edərək izləyici auditoriyasını genişləndirib. Hazırda onun hesabı 173 mindən artıq izləyiciyə sahibdir və paylaşılan hər bir video yüksək baxış sayı və interaktivliklə seçilir. Onun ilk paylaşımı belə viral olub, 712 min baxış sayı toplayaraq diqqət çəkib.
Ən maraqlısı isə odur ki, bu hesabın da ən çox izlənilən videoları əsasən analar və atalarla bağlıdır. Görünür, istifadəçilər gündəlik həyatda yaşadıqları, amma bəzən ifadə edə bilmədikləri ailəvi situasiyaları onun videolarında tapırlar.
Məsələn, "Hər şeydə panika yaradan analar" mövzusunda hazırladığı video böyük rezonans doğurub və 1,3 milyon baxış sayı toplayıb. Videoda anaların hətta ən kiçik məsələlərdə belə narahatlıq keçirməsi və bu narahatlığın bəzən həddən artıq şişirdilməsi yumoristik bir tərzdə təqdim edilib.
Bundan əlavə, dostunu atası ilə tanış edən bir gəncin yaşadığı maraqlı və bəzən gülməli vəziyyətlərdən bəhs edən videosu da böyük populyarlıq qazanıb. Bu video 1,4 milyon baxış sayı əldə edərək platformada geniş yayılıb.
Rus dilində məzmun yaradan yaradıcılar arasında özünəməxsus üslubu və maraqlı obrazları ilə seçilən bu şəxs, qısa zamanda izləyicilərin diqqətini çəkərək populyarlıq qazanıb. Onun videoları yalnız yumoristik məzmun deyil, həm də düşünülmüş obrazlar və peşəkar ifa tərzi ilə fərqlənir. O, hər detalı incəliklə işləyir – geyimi, pariki, danışıq tərzi, aksessuarları və bədən dili birləşərək izləyicinin qarşısında tam, canlı bir xarakter yaradır.
Onun təqdim etdiyi obrazlar olduqca müxtəlifdir. O, müəllim, ana, nənə, uşaq, tələbə və bir çox fərqli rollara girərək gündəlik həyatda rast gəlinən situasiyaları gülməli tərzdə canlandırır. Hər bir obrazın özünəməxsus xarakteri var və izləyicilər onları asanlıqla tanıyır, real həyatda rast gəldikləri insanlarla müqayisə edirlər. Bunun sayəsində videoları həm əyləndirir, həm də insanları düşündürərək onları öz gündəlik həyatlarına başqa prizmadan baxmağa sövq edir.
Hesabın ən çox baxış toplayan videolarından biri isə universiteti yeni bitirmiş bir gəncin yaşadığı vəziyyətlər və bunun yumoristik təsviri haqqındadır. Bu video 2,1 milyon baxış sayı toplayaraq platformada geniş rezonans doğurub.
Beləliklə, o, sadəcə məzmun
yaradıcısı deyil, eyni zamanda izləyicilərin gündəlik həyatında mühüm yer tutan
situasiyaları ustalıqla ekrana gətirən bir rəqəmsal fenomendir.
Bu yaradıcılar təkcə məzmun istehsalçıları deyil, həm də platformaların yeni dövründə insanları birləşdirən, onları ortaq təcrübələr ətrafında bir araya gətirən şəxslərdir. Gülüş vasitəsilə münasibətlər qurur, gündəlik problemləri yumorla həll etməyə kömək edir və izləyicilərinə xoş anlar yaşadırlar.
Görünən odur ki, bu tendensiya getdikcə daha da güclənir və komediya janrında fəaliyyət göstərən yaradıcılar platformalarda əhəmiyyətli rol oynamağa davam edirlər. Unikal üslub, orijinal yanaşma və tamaşaçı ilə qurduqları güclü əlaqləri onları sadəcə TikTok fenomeni deyil, həm də yeni nəslin əyləncə mənbəyi edir.
