Gördüklərim və eşitdiklərim çox xoşuma gəldi. Qəbələdə ciddi komanda yaratmaq istəyirlər və bunda iştirak etmək mənim üçün maraqlıdır”. Apasport.az saytının məlumatına görə, bu fikirləri “Qəbələ”nin baş məşqçisi Toni Adams deyib.
Ötən ilin mayında bu vəzifəyə təyin olunan 45 yaşlı ingilis çalışdırıcı diqqət mərkəzindədir. Bu dəfə Rusiyanın məşhur “Sovetskiy Sport” qəzetinin müxbiri Adamsın “Qəbələ”dəki işi ilə bağlı reportaj hazırlamaq üçün ölkəmizə gəlib.
Adamsın sözlərinə görə, “Qəbələ”dəki postu məhz əldə etmək istədiyi iş imiş: “Klubda baş məşqçi vəzifəsi ilə yanaşı, faktiki olaraq, idman və texniki direktor funksiyalarını da yerinə yetirirəm. Bu mənim üçün çox böyük təcrübədir! Bilirsiniz, məndən tez-tez Qəbələdə darıxıb-darıxmadığımı soruşurlar. Ancaq mənin sadəcə, darıxmağa vaxtım yoxdur. Çünki səhərdən axşamadək işləyirəm. Klub rəhbərliyi tərəfindən özümə tam dəstək hiss edirəm ki, bu da çox vacibdir. Ferqyusson bir dəfə mənə dedi ki, Toni, öz klubunu tapmağa çalışma, öz prezidentini tap. “Qəbələ” bu planda mənim üçün ideal variantdır”.
London “Arsenal”ının əfsanəvi kapitanı “Qəbələ”dəki gələcək taleyinə, burada 5-10 il qalmağa hazır olması ilə bağlı deyilənlərə də toxunub. Adamsın sözlərinə görə, ingilis jurnalistlər onun fikirlərini təhrif ediblər: “Bunu da ingilis qəzetçilər uydurublar! Mən belə şey deməmişəm. Əslində, hər şey çox sadədir. “Qəbələ” ilə müqaviləm 3 ilikdir. Bu müddətdə stadion tikməli, çempionluğu qazanmalı və elə bir klub qurmalıyıq ki, artıq mənsiz də fəaliyyət göstərə bilər. Sonradan isə Avropaya qayıdıb, elə komandaya işə düzəlmək istəyirəm ki, orada bütün təşkilatçılıq yüksək səviyyədə olsun, mən isə yalnız baş məşqçiliklə məşğul olum”.
Adams “Qəbələ”dən sonra Rusiyada işləyəcəyini də istisna etməyib: “Əlbəttə, mən öz qiymətimi bilirəm. Düzdür, başa düşürəm ki, hələ çox şey öyrənməliyəm. Ötən qış bir neçə günlük İtaliyaya getdim. Mourinyonun “İnter”i necə çalışdırdığını görmək istəyirdim. Onda Joze mənə dedi ki, Toni, mən bir məşqçi kimi səni 15 il qabaqlayıram. Sən futbol oynayanda mən Lui van Qal və Bobbi Robsonla işləyirdim, onlardan öyrənirdim. Bu, doğrudur”.
