TQDK-dan şok qərar: Təhsil haqları 1000 manatdan 2500 manata qaldırıldı
GƏNCLİK
18:43 08.06.2011
6162
1000 MANATDAN 2500 MANATA QALXAN TƏHSİL HAQQI
Ən çox artım Azərbaycan Tibb Universitetinin «Müalicə işi»nin ödənişli bölməsinin əyani şöbəsində olub. Bu fakültədə illik təhsil haqqı 1000 manatdan 2500 manata qaldırılıb.
Azərbaycan Müəllimlər İnstitutu, Texniki Universitet, İqtisad Universiteti, Neft Akademiyası, Pedaqoji Universitet, Dillər Universiteti və daha bir sıra ali təhsil müəssisələrin bir çox fakültələrində illik təhsil haqqı 300 manata qədər artıb.
Tibb Universitetinin Tədris Şöbəsinin inspektoru AzadlıqRadiosuna deyib ki, təhsil haqqını universitet təyin etmir, bu onlara TQDK-dan gələn qiymətlərdir.
İndi Azərbaycanın ali təhsil müəssisələrində ən aşağı təhsil haqqı 900, ən yuxarı təhsil haqqı isə 4500 manatdır.
Təhsil haqqının ən yuxarı olduğu universitet Qafqaz Universitetidir. Bu Universitetin Beynəlxalq münasibətlər (tədris ingilis dilindədir) fakültəsində illik təhsil haqqı 4500 manatdır.
TQDK QİYMƏTLƏRİN NAZİRLƏR KABİNETİNDƏN TƏQDİM OLUNDUĞUNU DEYİR
TQDK rəsmisi Elnur Nağızadənin AzadlıqRadiosuna deməsinə görə, onlara ali məktəblərdəki illik təhsil haqqı ilə bağlı məlumatlar Nazirlər Kabinetindən təqdim olur və Komissiya da bunun əsasında sənəd hazırlayır.
«TQDK-nın qiymətlərin müəyyənləşməsində heç bir rolu yoxdur. Ali təhsil müəsissələrinin rəhbərləri Nazirlər kabinetinə müraciət edir və NK da həmin müraciətlər əsasında bizə qəbul planı ilə yanaşı təhsil haqqı qiymətlərini təqdim edir».
REKTOR DEYİR BİZ MÜRACİƏT ETMƏMİŞİK
Milli Məclisin Elm və Təhsil Komitəsinin sədri və İqtisad Universitetinin rektoru Şəmsəddin Hacıyev isə deyir ki, onlar təhsil haqqının artırılması ilə bağlı Nazirlər Kabinetinə müraciət etməyiblər. Onun sözlərinə görə, bu dövlət sifarişi üçün təhsil alan tələbələrə aiddir və bu barədə Nazirlər Kabineti özü qərar qəbul edib.
«DÖVLƏTİN AYIRDIĞI PULLARI YEYİRLƏR, ƏVƏZİNDƏ...»
Təhsil eksperti Səftər Nəhmətov isə dövlət sifarişi məsələsi ilə razılaşmır. Deyir əgər dövlət sifarişi varsa onda təyinatlar da açıqlansın. Səftər Nəhmətov deyir ki, sifarişi verən dövlət yaxşı olar ki, elə pulu da özü ödəsin.
«Məncə burda başqa məqamlar var. Dövlətin ayırdığı pulları yeyirlər, onun əvəzində ölkədə maaşlarda, təqaüdlərdə heç bir artım olmadığı halda onsuz da çox olan təhsil haqqını daha da artırırlar. Bundan başqa ötən ilki təhsilin səviyyəsi və maddi texniki bazası arasında nə qədər dəyişiklik olub ki, təhsil haqqın bu qədər artırırlar».
Səftər Nəhmətova görə, rəsmi qurumlar təhsil haqqının artırılması səbəblərinə aydınlıq gətirməlidirlər.
OXŞAR XƏBƏRLƏR
ƏN SON XƏBƏRLƏR
