AZXEBER.COM Modern.az-a istinadən xəbər verir ki, "The Wall Street Journal” tərəflərin barışmasının detalları barədə məlumat yayıb.
Məlumata görə, Mask 2026-cı ilin noyabrında keçiriləcək aralıq seçkilərində Respublikaçılar Partiyasının Konqres üzərində nəzarəti qorumasına kömək etmək üçün ən azı 100 milyon dollar xərcləməyi planlaşdırır.
Bu qərar Tramp və Mask arasında uzun müddət davam edən siyasi qarşıdurmadan sonra münasibətlərin yenidən normallaşdığını göstərir. Tərəflərin barışması üçün bir neçə ay ərzində vitse-prezident Cey Di Vens, Trampın yaxın tərəfdarları və konservativ fəal Çarli Kirk də daxil olmaqla bir sıra şəxslərin vasitəçilik etdiyi bildirilir.
Mask daha əvvəl Respublikaçılardan uzaqlaşaraq yeni siyasi partiya yaratmaq ehtimalını gündəmə gətirmişdi. Lakin son dövrdə o, yenidən Respublikaçılara dəstək vermək qərarına gəlib və seçkilərdə seçici fəallığının artırılmasına maliyyə ayırmağı planlaşdırır.
Məlumatlara əsasən, Maskın siyasi komitəsi "America PAC” Respublikaçı seçicilərin fəallığının artırılması üçün 100-120 milyon dollar arasında vəsait xərcləməyi planlaşdırır.
