ABŞ Prezidenti Donald Trampın Qəzza zolağında barışıq əldə edilməsi planı Vaşinqtonun İsrailin İordan çayının qərb sahilini ilhaq etməsinin qarşısını almaq üçün zəmanət verməsini nəzərdə tutur.
AZXEBER.COM xəbər verir ki, bu barədə "Al Hadath" telekanalı sənədə istinadən məlumat verib.
Məlumata görə, plana əsasən, ABŞ İsrailin İordan çayının qərb sahilini ilhaq etməsinin qarşısını almağı öz öhdəsinə götürəcək. Trampın təşəbbüsü Qəzza zolağında dərhal atəşkəs əldə edilməsini, bütün israilli girovların azad edilməsini və ömürlük həbs cəzasına məhkum edilən 100-200 nəfər də daxil olmaqla, minlərlə fələstinli məhbusun azadlığa buraxılmasını əks etdirir.
Planın həyata keçirilməsi üçün şərt Fələstinin HƏMAS hərəkatının anklavda hakimiyyətinə son verilməsidir. ABŞ liderinin təklifinə əsasən, Qəzzanı idarə etmək üçün Fələstin Milli Administrasiyasının formalaşdıracağı komitə yaradılmalıdır.
"Al Hadath"ın məlumatına görə, Trampın planı İsrail qüvvələrinin qrafikə uyğun olaraq Qəzza zolağından tədricən çıxarılmasını, eləcə də anklav ətrafında 500-1000 metr enində təhlükəsizlik dəhlizinin yaradılmasını nəzərdə tutur.
Xatırladaq ki, sentyabrın 23-də Donald Tramp Səudiyyə Ərəbistanı, BƏƏ, Misir, İordaniya, Qətər, Türkiyə və İndoneziya nümayəndələri ilə görüşüb və Qəzza zolağında münaqişənin nizamlanması perspektivlərini müzakirə edib. ABŞ prezidenti yeni nizamlanma planını açıqlayıb ki, bu, münaqişə bitdikdən sonra ərəb və islam ölkələri hərbi qulluqçulardan ibarət beynəlxalq kontingentin anklavda yerləşdirilməsini nəzərdə tutur. Plana HƏMAS-ın əlində olan bütün girovların eyni vaxtda azad edilməsi ilə bağlı bənd də daxildir.
Qəzetin mənbələrinin məlumatına görə, görüş iştirakçıları ABŞ-nin təkliflərini müsbət qarşılayıblar, lakin Fələstin Milli Administrasiyasının Qəzzanın müharibədən sonrakı idarəçiliyi ilə bağlı proseslərə daha çox cəlb olunmasının vacibliyini vurğulayıblar.
\Oxu.Az
