Türkiyəni İstanbul şəhərində aprelin 23-də baş verən 6.2 bal gücündəki zəlzələdən sonra 445 afterşok qeydə alınıb.
AZXEBER.COM oxu.az-a istinadən xəbər verir ki, bu barədə Boğaziçi Universiteti Kandilli Rəsədxanasının hesabatında bəyan edilib.
Bildirilir ki, afterşoklar əsasən Orta Mərmərə və Kumburqaz seqmenti arasında, 15-20 kilometrlik bir sahədə cəmlənib. İlk əsas zəlzələdən sonra 5.2 bal gücündə iki böyük afterşok da yaşanıb.
O da qeyd olunur ki, Mərmərə bölgəsi və ətraf ərazilərdə hiss olunan zəlzələyə görə sunami xəbərdarlığı verilib.
"Müvafiq zəlzələdən altı dəqiqə sonra sunami xəbərdarlığı mesajlarımız ölkə daxilində AFAD-a, regionda isə sistemimizə üzv olan ölkələrin aidiyyəti qurumlarına göndərildi. Aparılan müşahidələr nəticəsində sunami xəbərdarlığı cihaz vasitəsilə təsdiqləndi. Yerli vaxtla saat 16:53-də isə sunami təhlükəsinin aradan qalxdığını bildirən mesaj yayımlanaraq xəbərdarlıq rəsmi şəkildə sonlandırıldı", - deyə hesabatda vurğulanıb.
Kandilli Rəsədxanası afterşokların bir müddət daha davam edəcəyini vurğulayıb və vətəndaşlara riskli binalardan uzaq durmaları tövsiyə olunub.
