Ermənistanın Azərbaycana növbəti təxribatından sonra bir neçə ukraynalı müğənni Azərbaycandakı konsertini təxirə salıb. Həmin müğənnilər bunu Ermənistanın itkilərinə görə etdiyini bildirib.
Ukraynalı müğənnilərin bu cür addımları Azərbaycan cəmiyyətində birmənalı qarşılanmayıb. Ukrayna və Azərbaycan xalqları arasında geniş əlaqələrin olduğu zaman ukraynalı müğənnilərin Ermənistana görə, konsertlərini təxirə salmaları vətəndaşlarımız tərəfindən qəzəblə qarşılanıb.
Bəs bu cür vəziyyətin ortaya çıxması nə ilə əlaqədardır?
Ağ Partiyanın sədri Tural Abbaslı AZXEBER.COM-a açıqlamasında məsələyə münasibət bildirib.
O, qeyd edib ki, Ukraynanın konkret və kəskin olaraq Azərbaycanın mövqeyini müdafiə elədiyini görməmişik:
"Bu məsələ düşündürücü hadisədir. Çünki Rusiya-Ukrayna münaqişəsi başlayandan əhalimizin 90 faizi birmənalı olaraq Ukraynanın və Ukrayna xalqının yanındadır. Hətta günün bu günündə belə bir çox insanlarımızının siyasi, ictimai xadimlərin, mədəniyyət xadimlərimizin, bir çoxlarının feysbuk sosial hesablarındakı şəkillərində Ukrayna bayraqları var. Bəziləri Zelenskinin şəklini qoyur. Yəni birmənalı olaraq Ukraynanı dəstəkləyirlər. Hətta Azərbaycan əsilli kifayət qədər şəhid də var ki, Ukraynanın azadlığı uğrunda mübarizə aparırlar, döyüşürlər. Amma təəssüf doğurucu haldır ki, biz Ermənistan-Azərbaycan qarşıdurmasında 44 günlük müharibədən sonra demək olar ki, heç bir halda Ukraynanın konkret və kəskin olaraq Azərbaycanın mövqeyini müdafiə elədiyini görməmişik. Əslində incəsənət xadimlərinin də hərəkətləri bir daha bunu sübut edir ki, Ukrayna xalqı ən yaxşı halda Azərbaycan və Ermənistana bərabər baxır. Bərabər qiymətləndirir”.
Tural Abbaslının sözlərinə görə, Azərbaycan - Ermənistan münaqişəsi uzanarsa, Ukraynadan Azərbaycanın əleyhinə bəyanatlar da ola bilər:
"Biz xalq olaraq, insanlar olaraq, dövlət olaraq bir daha düşünməliyik ki, bir az kompaniyaçılıqdan, dünya trendlərinə uymaqdan kənara qaçmalıyıq. Hər bir millətin, dövlətin özünün maraqları olmalıdır. Bu baxımdan da millətimiz artıq kor-koranə heç kimə inanmasa, yaxşıdır. Hətta mən Azərbaycan və Ermənistan arasındakı bu münaqişə uzanarsa, Ukraynanın bəzi siyasi rəhbərliyindən də Azərbaycanın əleyhinə olacaq bəyanatlar eşitməyimizə də inanıram. Yəni belə hallar da ola bilər.
Azərbaycanlə Qarabağ qazisinin hələ də Ukraynada həbsdə saxlanılması, hansı ki, Ukraynanın dövlətçiliyi şübhə altındadır, amma guya qanunlar var deyib, bizim qazimizi məhkəmələrdə süründürürlər, həbs təhlükəsi var. Bütün bunları qiymətləndirəndə görünür ki, Ukraynanın Azərbaycana münasibəti, məsələn Mozambikin Azərbaycana münasibəti ilə heç bir fərqi yoxdur. Cibutinin Azərbaycana münasibəti ilə heç bir fərqi yoxdur. Bizim onlara olan münasibətimizə rəğmən onların bizə belə soyuq münasibəti təbii ki, qırıcıdır. Mən əvvəldən də insanlarımızın bu məsələlərə bir az ayıqbaşlı, soyuqqanlı yanaşmalarının tərəfdarı olmuşam”.
"Amma inanmıram burada Qərbin əli olsun. Qərb gəlib ukraynalı müğənnilərə demir ki, get istaqramda, fesbukda ermənilərə dəstək paylaş. Bu, onların içindən gəlir, eyni zamanda da Ukrayna siyasi elitasında da, mədəni-ictimai həyatında da kifayət qədər Ukrayna miqyasında iri fiqurlu ermənilər var. Onların da bu prosesdə təsirləri var” – deyə Tural Abbaslı əlavə edib.
Aydın Nuri
