Xatırladaq ki, UNEC-in rektoru, professor Ədalət Muradov və "McDonald’s Azərbaycan” şirkətinin baş direktoru Oskar Boqopolskinin 2021-ci ildə imzaladığı Memoranduma əsasən, tərəflər tələbələrin müxtəlif istiqamətlər üzrə biliklərinin inkişaf etdirilməsi, istehsalat və könüllü praktiki proqramların təşkili, təlim xərclərinin ödənilməsi, həmçinin sertifikatlaşdırmadan keçmə kimi məsələlərdə əməkdaşlığa başlayıblar.

Memorandumun müddəalarının icrası çərçivəsində ötən il fiziki imkanları məhdud tələbələrə maliyyə yardımının göstərilməsi layihəsinə başlanılıb. Belə ki, müəyyən davamiyyət meyarlarına uyğun olaraq, 15 namizəd arasından 5 UNEC tələbəsi seçilib və onlara maliyyə yardımı göstərilib. "McDonald’s Azərbaycan” şirkəti onların ötən tədris ili üçün təhsil haqqını tam ödəyib.

Bu tələbələrdən biri artıq universitet məzunudur, digər 4 nəfər isə "McDonald’s Azərbaycan” şirkətinin dəstəyi ilə təhsilini davam etdirəcək. Şirkət onların cari tədris ili üçün təhsil xərclərini qarşılayacaq.

Seçilmiş tələbələrdən biri Fransanın Monpelye Universiteti ilə birgə həyata keçirilən ikili diplom proqramı üzrə təhsilini başa vurmuş Əhməd Abdullayevdir.

 

 

 2022-ci ildə UNEC-in Maliyyə və mühasibat fakültəsini bitirən Əhməd eyni zamanda iki ali təhsil müəssisəsinin diplomunu əldə edib.

"Mən 3-cü qrup əliləm. Bütün lazımi meyarlara cavab verdiyim üçün proqramda iştirak üçün müraciət etmək qərarına gəldim.

Xüsusi komissiya bütün müraciətlərə baxdıqdan sonra yaxşı qiymətlərimi nəzərə alaraq, məni 5 qalibdən biri kimi seçdi. Siyahı 2021-ci ilin dekabrında dərc olundu və orada adımı görəndə sevincimin həddi-hüdudu yox idi. Bu layihə tələbələr üçün əla fürsətdir. Təhsil almaq və inkişaf etmək istəyən gəncləri dəstəklədiyi üçün "McDonald’s Azərbaycan” şirkətinə təşəkkür etmək istəyirəm”.

Müsabiqənin digər qalibi, Biznes və Menecment fakültəsinin 2-ci kurs tələbəsi Telli Yusifli də Ə.Abdullayevlə eyni fikirdədir:

"Mən də xüsusi komissiya tərəfindən seçilən və "McDonald’s Azərbaycan”dan dəstək alan 5 tələbədən biriyəm. Şirkət mənim bütün təhsil xərclərini ödəyir. Bu gözəl təşəbbüsə görə dərin minnətdarlığımı bildirirəm”.

Maliyyə və mühasibat fakültəsinin 4-cü kurs tələbəsi Nəzrin Abbaslı da proqramda iştirakla bağlı təəssüratlarını bölüşüb:

"Şirkət tərəfindən dəstəklənən 5 tələbə arasında olmaq məni çox sevindirdi. O qədər xoşbəxt idim ki, əvvəlcə bunun həqiqət olduğuna inana bilmirdim. Əminliklə deyə bilərəm ki, bu, mənim daha da yaxşı oxumağım və əldə etdiklərimlə kifayətlənməməyim üçün stimul oldu. Bu gözəl proqramın həyata keçirilməsində əməyi olan hər kəsə öz adımdan və ailəmizin adından təşəkkür edirəm!”.

UNEC-in Zaqatala filialının 2-ci kurs tələbəsi Aşabel Osmanova xatırlayaraq deyir ki, "McDonald’s Azərbaycan” şirkətinin onun təhsili ilə bağlı bütün xərcləri öz üzərinə götürməsi haqqında xəbər bütün ailəsi üçün xoş sürpriz olmuşdu.

"Seçilmiş 5 tələbədən biri olduğumu öyrənəndə sevincimin həddi-hüdudu yox idi. "McDonald’s Azərbaycan” bu tədris ilində yenidən təhsil xərclərimi öz üzərinə götürdü və bununla, ailəmizə böyük dəstək vermiş oldu. Tələbə və onun valideynləri üçün bundan böyük sevinc ola bilməz.

Ümid edirəm ki, nə vaxtsa "McDonald's"ın Zaqatala-Balakən bölgəsində də filial açacaq. Orada menecer kimi işləmək şansım olsa, buna şad olaram! Bu gözəl layihəyə görə təşkilatçılara bir daha təşəkkürümü bildirirəm”, - Aşabel Osmanova bildirib.