Xəbər verdiyimiz kimi, Elm və Təhsil naziri Emin Əmrullayev keçirdiyi brifinqdə fənn müəllimlərinin dərs keçdiyi uşaqlara yenidən repititorluq etməsini düzgün hesab etmədiyini bildirib.

AZXEBER.COM xəbər verir ki, təhsil eksperti Kamran Əsədov da mövzu ilə bağlı açıqlama verib.

O bildirib ki, məktəb lazımi bilik vermirsə, repetitor sistemini günahlandırmaq doğru yanaşma deyil: 

"Biz təhsilin bir dövrəsinə gəlib çatmışıq ki, uşaqlar 1-ci sinifdən repetitor yanına gedir, sanki məktəb yoxmuş kimi… Bu, təhsilin uğursuzluğu deyilmi? 

Əgər məktəb lazımi bilik vermirsə, repetitor sistemini günahlandırmaq nə qədər doğrudur?

Ekspert həmçinin bildirib ki, repetitorluq fəaliyyəti məhdudlaşdırılmamalıdır: 

Repetitorluq tədricən ləğv olunsa, bəs yerinə nə qoyulacaq? Məktəblər nə qədər hazırdır? Müəllimlər dərs yükü, şagird sayı, proqramın ağırlığı ilə repetitorluq olmadan eyni nəticəni təmin edə biləcəkmi?

Hazırlıq sistemini ləğv etməklə problemi həll etmirik. Təhsili keyfiyyətli etmədən, repetitorluğu ləğv etməyə çalışmaq, xəstəlik müalicə olunmadan dərmanı atmaq kimidir. Əsas məsələ məktəbdə elə təhsil verməkdir ki, repetitor ehtiyacı yaranmasın.

Ekspert ibtidai sinifdə şagirdləri repetitor yanına göndərməyi düzgün hesab etmədiyini deyib: 

"İbtidai siniflərdə uşaqların repetitor yanına göndərilməsi onların uşaqlığını əlindən almaqdır. Amma orta və yuxarı siniflərdə bəzi fənlər üzrə əlavə dəstək həmişə lazım olacaq. Hər şagird fərqlidir və məktəbdə hamının eyni templə öyrənməsi mümkün deyil. Əsas məsələ odur ki, repetitorluq məcburiyyət yox, seçim olsun".

Məktəblərdə verilən təhsilin yetərincə güclü olduğu zaman repititorluğun azalacağını deyən Əsədov sözünə davam edib: 

"Əgər məktəblər yetərincə güclü olsa, repetitorluq təbii olaraq azalacaq. Amma məktəbləri dəyişmədən, sadəcə repetitorluğu ləğv etməklə, biz sadəcə uşaqların əlindən bir şans almış oluruq. İslahat ən zəif halqadan yox, sistemin özündən başlamalıdır!".