"Məktəb yalnız bilik verilən məkan deyil, həm də gələcəyin vətəndaşının formalaşdığı mühitdir. Ona görə də məktəbli geyiminə sadəcə parça, rəng və model məsələsi kimi baxmaq doğru deyil. Burada söhbət daha böyük anlayışlardan – bərabərlikdən, nizam-intizamdan, dünyəvi təhsildən və dövlətin gələcək nəsillər qarşısındakı məsuliyyətindən gedir”
Bu sözləri Milli Məclisin deputatı Vüqar İskəndərov deyib.
O qeyd edib ki, məsələyə fərqli prizmadan yanaşmalıyıq:
"Məncə, məsələyə fərqli prizmadan yanaşmalıyıq. Məktəb uşaqların geyimlə deyil, biliklə fərqləndiyi yer olmalıdır. Bir şagirdin ailəsinin maddi imkanları, digərinin dini baxışları və ya sosial mənsubiyyəti sinif otağında üstünlük, yaxud ayrı-seçkilik meyarına çevrilməməlidir. Vahid məktəbli geyiminin əsas fəlsəfəsi də məhz budur. Digər mühüm məqam təhsilin dünyəviliyidir. Azərbaycan dünyəvi dövlətdir və bu prinsip kiminsə dini inancına qarşı yönəlməyib. Əksinə, müxtəlif inanclara malik insanların eyni hüquqlarla yaşamasının təminatıdır. Dünyəvilik dinsizlik deyil, dövlət təhsilinin dini təsirlərdən müstəqilliyidir. Bu iki anlayışı bilərəkdən qarışdırmaq cəmiyyətdə süni qarşıdurma yaratmaqdan başqa heç nəyə xidmət etmir”.
Parlamentari qeyd edib ki, dini etiqad şəxsin konstitusion hüququdur:
Dini etiqad şəxsin konstitusion hüququdur. Lakin dövlət məktəbinin də qanunvericiliklə müəyyən edilmiş qaydaları var. Bu qaydaların tətbiqi hər hansı dinə münasibət kimi təqdim edilməməlidir. Eyni zamanda, onların icrasında uşaqların təhsil hüququ, ləyaqəti və psixoloji vəziyyəti mütləq nəzərə alınmalıdır. Bir məqamı da unutmayaq: uşaqlar böyüklərin ideoloji mübahisələrinin iştirakçısına çevrilməməlidir. Məktəb qapısında siyasi və dini mübarizə aparmaq istəyənlər düşünməlidirlər ki, həmin qapıdan içəri siyasətçi və ya din xadimi deyil, təhsil almaq istəyən uşaq daxil olur. Biz məktəbdə geyim üzərində mübahisə aparmaqdan daha çox, o geyimi daşıyan uşağın hansı bilik və dünyagörüşü ilə böyüdüyünü düşünməliyik”.
"Azərbaycanın gələcəyi məktəbli formasının rəngindən deyil, həmin formanı geyinən nəslin intellektindən, vətənpərvərliyindən və müstəqil düşünmək bacarığından asılı olacaq. Məktəbin əsas missiyası da budur: fərqli ailələrdən gələn uşaqları ortaq bilik, bərabər imkanlar və vətəndaşlıq dəyərləri ətrafında birləşdirmək”,-deyə deputat vurğulayıb.
Şahanə Ziyad
