Baş Prokurorluq "UĞUR-777” estetik mərkəzi və vətəndaş Gülbadə Abdullayeva ilə bağlı mediada yayılan məlumatlara dair açıqlama yayıb.
AZXEBER.COM xəbər verir ki, qurumun məlumatına görə, "UĞUR-777” estetik mərkəzində qanunsuz tibbi fəaliyyət və Gülbadə Abdullayevanın müvafiq sertifikasiya şəhadətnaməsi olmadan həkim kimi fəaliyyət göstərməsi ilə bağlı yayılan məlumatlar əsasında Nəsimi Rayon Prokurorluğunda araşdırma aparılıb və cinayət işi başlanıb.
İbtidai istintaq zamanı toplanan sübutlar əsasında üç nəfər müxtəlif maddələrlə təqsirləndirilən şəxs qismində cinayət məsuliyyətinə cəlb edilib. Cinayət işi üzrə ittiham aktı təsdiqlənərək 22 aprel 2026-cı ildə baxılması üçün Bakı Ağır Cinayətlər Məhkəməsinə göndərilib. Hazırda məhkəmə baxışı davam edir.
Baş Prokurorluq bildirib ki, Gülbadə Abdullayeva barəsində Cinayət Məcəlləsinin 310-cu maddəsi ilə cinayət təqibinə amnistiya qərarının tətbiqi ilə əlaqədar xitam verilib. Həmçinin istintaq zamanı onun əməllərində Cinayət Məcəlləsinin 142.1-ci maddəsində nəzərdə tutulan cinayət tərkibinin əlamətləri müəyyən edilməyib.
Bundan başqa, Gülbadə Abdullayeva tərəfindən zərərçəkmiş şəxsə vurulmuş 2 min manat maddi ziyanın və dövlət büdcəsinə ödənilməli olan 500 manatın tam həcmdə ödənilməsi təmin olunub.
Onun barəsində İnzibati Xətalar Məcəlləsinin 215.1 və 428.1-ci maddələri ilə başlanmış icraat nəticəsində cərimə növündə inzibati tənbeh tətbiq edilib.
