"Uğurlu tərəfdaşlıqda xanım sahibkarlar” layihəsi çərçivəsində yanvarın 21-də "Gizli Bahçe” restoranında "İşgüzar Səhər Yeməyi” təşkil olunub.
AZXEBER.COM xəbər verir ki, görüşdə 40-a yaxın xanım sahibkar və dövlət qurumlarının nümayəndələri iştirak edərək qarşılıqlı tanışlıq, yeni yanaşmalar, təcrübə mübadiləsi və fəaliyyət istiqamətləri barədə fikir mübadiləsi aparıblar.
Tədbirdə Dövlət Məşğulluq Agentliyinin İdarə Heyətinin sədri Hasil Abbasov, İş Adamları Cəmiyyətinin Milli Assosiasiyasının (İCMA) İdarə Heyətinin sədri və Marsol Group-un təsisçisi Tural Mustafayev iştirak edərək xanım sahibkarların təşəbbüslərini dəstəklədiklərini vurğulayıblar. Çıxışlar zamanı qadın sahibkarlığının inkişafının iqtisadi və sosial əhəmiyyətinə diqqət çəkilib.
Görüş çərçivəsində xanım sahibkarlar Dövlət Məşğulluq Agentliyinin təqdim etdiyi dəstək mexanizmləri ilə bağlı Hasil Abbasovla sual-cavab sessiyası keçiriblər.
Qeyd edək ki, layihə Kiçik və Orta Biznesin İnkişafı Agentliyi (KOBİA), Marsol Group və İş Adamları Cəmiyyətinin Milli Assosiasiyasının (İCMA) birgə təşkilatçılığı, Birbank Biznes-in rəsmi tərəfdaşlığı ilə həyata keçirilir. Layihə çərçivəsində təlimlər və tədbirlər, işgüzar səhər yeməkləri, ofis və istehsalat ziyarətləri, eləcə də sosial fəaliyyətlərin təşkili nəzərdə tutulur.
Layihənin baş sponsoru "Məlhəm Beynəlxalq Hospital”, sponsoru "Corian Baku”, tərəfdaşları "Ətirşah Parfüm” və "Gizli Bahçe” restoranı, promo tərəfdaşı isə "Moon Group”dur.
