İran ordusunda 24 saat ərzində uça bilən yeni pilotsuz təyyarə istifadəyə verilib. Bu barədə inqilab keşikçiləri korpusunun hava-kosmik şöbəsinin başçısı general Əmir Əli Hacızadə xəbər verib. İran dövlət kanalına verdiyi müsahibədə Hacızadə, pilotsuz təyyarənin Yaxın Şərq o cümlədən İsrailin çox hissəsini əhatə edə bildiyini və ümumilikdə 1 800 kilometrə yaxın məsafəni qət etmək gücündə olduğunu vurğulayıb. General onun məhz iranlı alimlər tərəfindən dizaynlaşdırıldığını və hazırlandığını diqqətə çatdırıb.
Qərbli ekspertlər ali zabitin sadaladığı texniki göstəricilərin ötən il İran ərazisində vurulmuş ABŞ pilotsuz təyyarəsi – “RQ-170”-in göstəricilərinə uyğun gəldiyini iddia edir. Xatırladaq ki, rəsmi Tehran aprel ayında qeyd edilən ABŞ təyyarəsinin eynisinin istehsalına başlanıldığını elan etmişdi. İran eyni zamanda pilotsuz təyyarənin hücum vasitələri ilə də təchiz olunacağını istisna etməmişdi. İran ABŞ və İsrailə qarşı kəşfiyyat müharibəsi apardığını aşkar şəkildə etiraf edir.
