Son zamanlar ishal, ürəkbulanma, qusma, qarın ağrısı kimi şikayətlərlə qarşılaşan uşaqların sayında ciddi artım müşahidə olunur.

AZXEBER.COM Türkiyə mediasına istinadən xəbər verir ki, belə hallarla əlaqədar Dr. Lale Seren valideynləri xəbərdar edib.

Həkimin sözlərinə görə, ishal 1-5 yaş arası uşaqlarda tez-tez rast gəlinən ciddi təzahürdür. Uşaqlarda ishal tez-tez qusma və qarın ağrısı ilə müşayiət olunur. Hansı vəziyyətlərin təcili olduğunu bilmək vacibdir. Çünki ishal düzgün müalicə olunmazsa, bu, maye itkisinə səbəb ola bilər və uşağın orqanizmində su-duz balansını poza bilər. Bu xüsusilə 2 yaşdan kiçik körpələr üçün təhlükəlidir.

Həkim bildirib ki, xüsusilə ishalın qarşısının alınmasında və ishal dövründə ehtiyacın ödənilməsində ana südünün rolu çox yüksəkdir. Bu dövrdə ana südü ilə qidalanma tezliyi artırılmalıdır. Bundan əlavə, ishal üçün uyğun bir pəhriz tez-tez ishal müddətini qısaldır. Soyulmuş alma, banan, şaftalı, qaynadılmış kök, kartof, qatıq şorbası, düyü və ya düyü sıyığı, qatıq, ayran, kefir bu dövrdə övladınıza verə biləcəyiniz qidalardır.

Nə vaxt həkimə müraciət etmək lazımdır?

1) Əgər uşağınız 6 aydan kiçikdirsə,

2) Gündə 7-8 dəfədən çox ishal varsa,

3) Yüksək hərarəti varsa,

4) Qarın ağrısı şiddətlidirsə,

5) Çox yorğunsa, daimi yuxululuq və ya əhval dəyişikliyi varsa,

6) Susuzluq əlamətləri varsa, (Uşağın ağzı qurudursa, ağlayanda göz yaşı axmırsa, körpə 4-6 saat sidiyə getmirsə, böyük uşaq 6-8 saat...)

7) Təkrar qusma səbəbindən su və ya digər maye qidaları qəbul edə bilmirsə,

8) Qanlı ishal varsa gecikmədən həkimə müraciət edilməlidir.

İshalın səbəblərini 3 maddədə sadalamaq olar:

Viruslar:Uşaqlarda ishalın ən çox görülən səbəblərindən biridir. Xüsusilə ilk 5 ildə və qış mövsümündə daha çox rast gəlinir.

Bakteriyalar:Bakteriyaların yaratdığı diareyanı virusların yaratdığı ishaldan ayırd etmək çox vaxt çətindir. Bununla belə, bakterial ishal zamanı hərarət adətən daha yüksək olur, qanlı və ya selikli nəcis aydın görünür.

Parazitlər:Uşaqlarda diareyə səbəb ola biləcək parazitar infeksiyalara daxildir.

Qarşısının alınması üçün 7 təsirli üsul var:

1 – Əllərin yuyulması ən vacib qorunma vasitələrindən biridir, çünki sabunla viruslar və bakteriyalar təsirsiz olur. Xüsusilə uşaq bezlərini dəyişdirdikdən, tualetdən istifadə etdikdən sonra, yemək hazırlamazdan əvvəl əllərin təmizlənməsinə xüsusi diqqət yetirilməlidir. Uşaqlara əllərini yumağı da öyrətmək lazımdır.

2 – İshal yaradan adenoviruslar tənəffüs yolu ilə də keçə biləcəyi üçün sosial məsafəyə diqqət yetirilməlidir.

3 – Təmizliyinə əmin olmayan və ya mənşəyi bilinməyən su içilməməlidir.

4 – Çiy meyvə və tərəvəzlər bol su ilə diqqətlə yuyulmalıdır.

5 – Oyuncaqların və uşaqların olduğu mühitlərin təmizliyi unudulmamalıdır.

6 – Rotavirus peyvəndi ishala səbəb olan rotavirusun qarşısının alınmasında həyati əhəmiyyət kəsb edir.

7 – İshal yox olana qədər məktəbə getməmək, digər uşaqlara keçirməmək gərəkdir.

Ayşən