Ötən gün Prezident İlham Əliyev alkoqollu içkilərə minimum qiymət qoyulması ilə bağlı fərman imzalayıb.
Bu o deməkdir ki, bundan sonra Azərbaycanda alkoqollu içkilərin pərakəndə satışı minimum qiymətlə icra ediləcək.
Bəs, iqtisadi cəhətdən bu necə tətbiq olunacaq? Hansı mexanizmlər nəzərdə tutulub?
Məsələ ilə bağlı AZXEBER.COM-a açıqlama verən Milli Məclisin deputatı, iqtisadçı ekspert Vüqar Bayramov Prezidentin alkoqollu içkilərlə bağlı fərmanını şərh edib:
"Alkoqollu içkilərə minimum qiymətin tətbiq edilməsi bir sıra inkişaf etmiş ölkələrdə tətbiq edilən praktikadır. Eyni zamanda bəzi MDB ölkələrində də bu praktikadan istifadə olunur. Təbii ki, burada məqsəd həm də Ümumdünya Səhiyyə Təşkilatının tövsiyyələrinə uyğun olaraq alkoqollu içkilərə əlçatanlığın azaldılması və istehlakın optimallaşdırılmasıdır. Nəzərə alsaq ki, bu xüsusən İrlandiya, Şotlandiya, Böyük Britaniyada ilk olaraq tətbiq olundu və məqsəd də daha çox məhz sağlamlıq meyarı idi. Bu, ÜST tərəfindən tövsiyyə olunurdu. Ona görə də təbii ki, məqsəd Azərbaycanda tətbiq olunacaq yeni praktikadır. Onu da nəzərə alsaq ki, minimum qiymətlər spirt məhsullarına aid olunacaq. Ən vacib məqsəd isə keyfiyyətsiz alkoqol içkilərinə qarşı mübarizənin gücləndirilməsindən ibarətdir".
Deputat bildirib ki, alkoqollu içkilərlə bağlı verilən qərar ÜST-nın tövsiyyəsinə uyğun həyata keçirilib:
"Nazirlər Kabineti tərəfindən araq məhsulları üzrə minimum qiymətlər müəyyənləşəcək. O zaman təbii ki, qiymətlərin necə dəyişməsini söyləmək mümkün olacaq. Amma, bütövlükdə digər ölkələrin praktikası göstərir ki, bu, Ümumdünya Səhiyyə Təşkilatının tövsiyyəsinə uyğun olaraq həyata keçirilən bir təşəbbüsdür. Məqsəd burada iqtisadi faktorlardan daha çox səhiyyə və sağlamlıq meyarlarıdır və əlbəttə ki, həm MDB, həm Avropa ölkələrində də məhz sağlamlıqla bağlı meyarlar nəzər alınmaqla bundan istifadə olunur".
Mikayıl Mirzəzadə
