"İran deputatlarının Azərbaycana qarşı imzaladığı sənəd kağız parçasıdır. Onların Azərbaycanı "sionist" rejimə dəstək verən ölkə adlandırması bizi narahat etmir".
Bu sözləri AZXEBER.COM-a millət vəkili Razi Nurullayev İran deputatlarının Azərbaycanla bağlı bəyanatına münasibət bildirərkən deyib.
Millət vəkili həmçinin qeyd edib ki, Azərbaycan xalqının İsrail dövlətinə olan hörməti, sevgisi təbiidir və qəbulediləndir:
"Azərbaycan İsraillə dost və müttəfiq ölkədir. İsrail bizim üçün əziz, qiymətli dövlətdir. Çünki, İrandan fərqli olaraq daim Azərbaycanın yanında olub, ona dəstək verib. 30 illik işğal dövründə də, 44 günlük Vətən Müharibəsində də biz İranı yox, İsraili daim yanımızda gördük. Azərbaycan xalqının da İsrail dövlətinə olan bu hörməti təbiidir, qəbulediləndir. Azərbaycan 30 il İranın xətrinə dəyməsin deyə İsraildə səfirlik açmadı. Bunun müqabilində İrandan sağol görmədik, əksinə İran Ermənistanla münasibətərini daha yaxşı etdi. Ermənistan rəhbərini İranda qəbul edərkən ayaqlarının altına qırmızı xalça sərdi. Nümayişkaranə onunla qucaqlaşıb, Azərbaycana gözdağı verməklə məşğul oldu".
İranın Azərbaycana 44 günlük Vətən Muharibəsi zamanı vurduğu zərbələrdən danışan millət vəkili bunları deyib:
"44 günlük müharibədə İran Azərbaycana zərbələr vurmaqla məşğul oldu. Gizli-gizli Ermənistana silah göndərməyə cəhd etdi, göndərdi də. İran Ermənistana dəstək verdi. İran deputatlarının Azərbaycana qarşı imzaladığı sənəd kağız parçasıdır. Onların Azərbaycanı sionist rejimə dəstək verən ölkə adlandırması bizi narahat etmir. İran özünü Azərbaycan xalqının gözündən salmış ölkədir. Azərbaycanın Tehrandakı səfirliyində terror aktı törətmiş və bunun arxasında duran ölkədir. İran bu gün də Azərbaycana qarşı düşmənçiliyini davam etdirir. Son olaraq Azərbaycanın mərkəzində, paytaxtında deputata qarşı terror aktını təşkil etdirdi. Bu gün İranın müxtəlif məsələlərlə bağlı Azərbaycanda törətmək istədiyi təxribatlar da artıq dövlətə məlumdur. Ona görə də İran dövlətinin Azərbaycanı günahlandırmağa mənəvi və hüquqi haqqı yoxdur".
Günel Hüseynli
