Sosial şəbəkələrdə vətəndaşın aldığı ciyər ətinin daxilində ağ düyünlərin və rəng fərqlərinin müşahidə olunduğunu əks etdirən görüntülər yayılıb.
Sözügedən görüntülər məhsulun keyfiyyəti və qida təhlükəsizliyi ilə bağlı müzakirələrə səbəb olub.
Bəs qaraciyərdə bu cür düyünlərin yaranmasına hansı amillər səbəb olur və bu, insan sağlamlığı üçün nə dərəcədə təhlükəlidir?
Mövzu ilə bağlı AZXEBER.COM-a danışan "Refresh Group” MMC-nin Baş İcraçı Direktoru Seymur Qafarov bildirib ki, qaraciyərdə müşahidə olunan ağ düyünlər müxtəlif parazitar xəstəliklərlə əlaqəli ola bilər.
"Şəkildə təqdim olunan görüntüdə heyvanın qaraciyər toxumasında fındıq böyüklüyündə düyünlər və törəmələr aşkar şəkildə görünür. Bu əlamətlərin bir sıra səbəbləri ola bilər. İlk növbədə, parazitar xəstəliklər ehtimal olunur. Bu düyünlərin yaranmasına səbəb olan parazitlərdən biri exinokoklardır. İri və xırdabuynuzlu heyvanların qaraciyərində kistik və əhəngləşmiş düyünlərin yaranmasına səbəb olan exinokoklar geniş yayılmış parazitlərdəndir. Parazit qaraciyərdə inkişaf edərək daxilində maye və digər möhtəviyyat olan kistalar əmələ gətirir. Zaman keçdikcə həmin nahiyələrdə əhəngləşmə baş verə və düyünlər sərtləşərək fındıq böyüklüyündə forma ala bilər. Digər ehtimal isə fassiolyoz və ya digər helmintozlarla bağlıdır. Qaraciyər qurdları və digər parazitlərin toxumalarda yaratdığı zədələnmələr, eləcə də bu nahiyələrdə inkişaf edən xroniki iltihabi proseslər nəticəsində fındıq böyüklüyündə düyünlər və ağımtıl ocaqlar əmələ gələ bilər. Şəkildə qaraciyərin ümumi görünüşündə, rəngində və toxumasında da diqqətçəkən dəyişikliklər müşahidə olunur".
Mütəxəssis qeyd edib ki, qaraciyərin rəngində və toxumasında müşahidə olunan dəyişikliklər də diqqət tələb edir.
"Sağlam qaraciyər, adətən, tünd qırmızı-qəhvəyi rəngdə və nisbətən hamar səthə malik olur. Burada isə toxuma daxilində görünən törəmələr və düyünlər orqanda patoloji prosesin mövcudluğuna işarə edə bilər.
Bu əlamətlər qida təhlükəsizliyi baxımından da ciddi narahatlıq doğurur. Belə dəyişikliklər aşkar edildikdə, baytarlıq müayinəsi aparılmadan qaraciyər və digər ət məhsulları istehlak edilməməlidir. Parazitar xəstəliklər, xüsusilə exinokokkoz, insan sağlamlığı üçün təhlükə yarada bilər. Buna görə də heyvan mənşəli məhsulların baytarlıq-sanitariya nəzarətindən keçirilməsi vacibdir”.
Fəridə Əsədzadə
