Son zamanlar respublikamızda təbliğat və təşviqat da kardinal dönüş görülməkdədir. Bunun əsas səbəblərindən biri dünya ensiklopediyası sayılan "Vikipediya” sahəsində aparılan ardıcıl işlərdir. Bu sahədə fəaliyyət göstərən Azərbaycan Milli Elmlər Akademiyası Mərkəzi Elmi Kitabxanası "Vikipediya” istiqamətində üfüqləri genişləndirir, hədəfi yüksəldir.
AZXEBER.COM xəbər verir ki, bu sözləri Yeni Azərbaycan Partiyası Gəncə şəhər təşkilatının sədri, Milli Məclisin deputatı Naqif Həmzəyev bildirib.
"Deyərdim ki, respublikanın ali məktəblərində "Vikipediya” Metodik Mərkəzlərinin yaradılması bu yöndə atılan ciddi addımlardandır. "Vikipediya” hərəkatının respublikanın digər şəhərlərinə yayılması, xüsusəndə bizim doğma Gəncədə belə bir mərkəzin yaradılması təqdirə layiq haldır. Bildiyiniz kimi bu yaxınlarda Azərbaycan Milli Elmlər Akademiyasının Mərkəzi Elmi Kitabxanasının (MEK) "Vikipediya” Metodik Mərkəzinin təşəbbüsü ilə Yeni Azərbaycan Partiyası (YAP) Gəncə şəhər təşkilatında yaradılan "Vikipediya” Metodik Mərkəzi fəaliyyətə başlayıb. Mərkəzin könüllüləri Gəncənin tarixi,mədəniyyəti,şəxsiyyətləri haqqında məqalələrin yaradılmasını və redaktəsini uğurla həyata keçirirlər. Həm də mərkəzdə "Vikimedia” Fondunun qlobal idarəçisi, Azərbaycan Dövlət Aqrar Universitetinin tələbəsi Rüfət Rəhimov təlimlər keçir. Təlimdə fənclərimizə "Vikipediya” aşılanır.
Çünki, "Vikipediya” ölkənin və dünyanın mədəni, iqtisadi, siyasi, texniki, elmi, sosial və digər sahələrini əhatə edən məsələləri işıqlandırmaqla məşğuldur. Bu gün dünyada baş verən yeniliklərin ictimaiyyətə çatdırılmasında internetin rolu danılmazdır. İnternetdən əsaslandırılmış ciddi istinadı olan məlumatların əldə edilməsində isə "Vikipedia”yanın əhəmiyyəti müqayisə edilməzdir. Bu istiqamətdə Mərkəzi Elmi Kitabxananın nəzdində fəaliyyət göstərən "Vikipediya” Metodik Mərkəzinin çox böyük imkanları var. Mərkəzi Elmi Kitabxana "Vikipediya”nın Azərbaycan bölümünün zənginləşməsinə çox böyük töhfələr verməkdədir. Çünki, onlar həm məqalələrin sayının artmasına, həm də müntəzəm təlimlər təşkil etməklə "Vikipediya” bilənlərin sayının artmasına xidmət edirlər.
Sonda onu da qeyd edim ki, hazırki, zamanda "Vikipediya”dan yeni gözləntilər böyükdür. Artıq hər şey "ənənəvi", əvvəlki kimi olmayacaq. Əminəm ki, "Vikipediya” çox ciddi hədəflərə nail olacaq”.
